ՀՀ քննչական կոմիտեի Լոռու մարզային քննչական վարչությունում ավարտվել է Դավիթ Խաչատրյանի առողջությանը դիտավորությամբ, կյանքին վտանգ սպառնացող ծանր վնաս պատճառելու դեպքի առթիվ հարուցված քրեական գործի նախաքննությունը, որի շրջանակներում պարզվել են կատարված հանցագործության դրդապատճառները, բոլոր հանգամանքները։
Մինչդատական վարույթում ձեռք բերված ապացույցների համաձայն՝ Արշավիր Կարապետյանը 2014 թվականի հունիսի սկզբներին Վանաձոր քաղաքում ծանոթացել է գործով տուժող Դավիթ Խաչատրյանի հետ, և վերջինս Ա.Կարապետյանի առաջարկով մի քանի օր բնակվել է նրա տանը:
2014 թվականի հունիսի 25-ին՝ ժամը 11:00-ի սահմաններում, Ա.Կարապետյանին է այցելել նրա ընկերը՝ Գ.Ղալեչյանը, որդու հետ միասին, որտեղ Դավիթ Խաչատրյանի հետ ալկոհոլ են օգտագործել:
Նույն օրը՝ ժամը 17:00-ի սահմաններում, նրանք գնացել են Վանաձոր քաղաքի արհեստական լճերի տարածք՝ լողալու: Քննության տվյալներով՝ լողափին ևս Ա. Կարապետյանն ու Գ.Ղալեչյանը գարեջուր են խմել: Այնուհետև Ա.Կարապետյանն ալկոհոլ օգտագործած վիճակում Դ.Խաչատրյանին մեկ անգամ անհիմն ապտակել է, որից հետո վերջինս հեռացել է:
Նույն օրը՝ ժամը 23:00-ի սահմաններում, Դավիթ Խաչատրյանը գնացել է Ա. Կարապետյանի տուն և տեսել, որ նա ննջասենյակում հյութի բաժակով սպիրտ է խմում, հանդիմանել է նրան՝ առանց սննդի ալկոհոլ օգտագործելու համար, ապա ձեռքից վերցնելով բաժակը` ասել է, որ սպիրտ խմելու դեպքում «կմեռնես»։ Նույն պահին Ա.Կարապետյանը, սպիրտ խմելն արգելելու պատճառով, ննջասենյակում գտնվող սեղանի վրայից վերցնելով խոհանոցային դանակը, դիտավորությամբ երեք անգամ հարվածել է Դավիթ Խաչատրյանի կրծքավանդակի առաջային մակերեսի, աջ հոնքի և ձախ ազդրի շրջանում։
Դատաբժշկական փորձաքննության եզրակացության համաձայն՝ հարվածների հետեւանքով վերջինիս առողջությանը պատճառվել է կյանքին վտանգ սպառնացող ծանր վնաս՝ կրծքավանդակի աջ կեսի ծակած-կտրած՝ կողերի, դիաֆրագմային, լյարդի վնասումով թափանցող վերքի, ձախ ազդրի, աջ հոնքի ծակած-կտրած վերքերի տեսքով:
Ձեռք բերված ապացույցների հիման վրա Ա.Կարապետյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով:
2014 թվականի նոյեմբերի 12-ին քրեական գործն ուղարկվել է ՀՀ Լոռու մարզի դատախազություն՝ քրեական գործով նախաքննության օրինականության նկատմամբ հսկողություն իրականացնող դատախազի կողմից մեղադարական եզրակացությունը հասատատելու և Լոռու մարզի ընդհանուր իրավասության դատարան ուղարկելու համար:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
ՀՀ քննչական կոմիտեի տեղեկատվության և
հասարակայնության հետ կապերի բաժին
