«ԱԺ նիստի օրակարգում է նաև Բարձրագույն դատական խորհրդի անդամի ընտրությունը։ «Քաղաքացիական պայմանագիր» խմբակցությունը առաջադրել է փաստաբան Ալեքսանդր Սիրունյանի թեկնածությունը։ Կոռուպցիայի կանխարգելման հանձնաժողովի կողմից թեկնածու Սիրունյանի բարեվարքության մասին եզրակացությանը ծանոթացե՞լ եք»,- ԱԺ նիստի ժամանակ Ալեն Սիմոնյանին հարց ուղղեց ընդդիմադիր պատգամավոր Գեղամ Մանուկյանը։ Ստանալով դրական պատասխան՝ պատգամավորը շարունակեց․ «Երբ ծանոթացա, շոկի մեջ էի։ Մինչև հարցի քննարկումը, կոչ կանեմ ՔՊ պատգամավորներին ծանոթանալ այն բարեվարքության եզրակացությանը, որը տվել է Կոռուպցիայի կանխարգելման հանձնաժողովը։ Վերանայեք ձեր որոշումը, դուք առաջադրում եք մի մարդու, որը հասարակական, ներազգային ատելության ահավոր մի օրինակ է, մարդ, որն ատում է սեփական հայրենակիցներին, մարդ, որը թշնամություն է տարածել տարիներ շարունակ»,- ասաց Մանուկյանը։
ԱԺ նախագահը խորհուրդ տվեց կարծիքներ հայտնել հարցի քննարկման ժամանակ։

Ալեքսանդր Սիրունյանի սկանդալային գրառումները կարդացեք Asekose.am-ի տելեգրամյան ալիքում

***

ԱԺ նիստի այսօրվա օրակարգում ընդգրկված է նաև Բարձրագույն դատական խորհրդի անդամի ընտրության հարցը։ «Քաղաքացիական պայմանագիր» խմբակցությունը առաջադրել է փաստաբան Ալեքսանդր Սիրունյանի թեկնածությունը։
ՔՊ-ական պատգամավոր Վլադիմիր Վարդանյանը պատասխանելով լրագրողի դիտարկմանը, թե լուրջ քննադատություններ կան, որ փաստաբան Ալեքսանդր Սիրունյանի հրապարակային խոսույթն ու հայհոյախառն մտքերը համատեղելի չեն այդ պաշտոնի հետ, ասաց․ «Խմբակցության մոտ դիրքորոշում ձևավորվում է բացառապես լիագումար նիստերի դահլիճում թեկնածուի ելույթն ու քննարկումը լսելուց հետո։ Ես առաջնորդվում եմ այն սկզբունքով, որ քանի դեռ անձը չի զբաղեցնում այն պաշտոնը, որը պահանջում է քաղաքական զսպվածություն, վերջինս կարող է արտահայտել մտքեր, որոնք գուցե հաճելի չլինի այս կամ այն խմբի համար։ Խոսքը այն լեգիտիմ շեմի մասին է, որ Եվրոպական դատարանը դիտարկում է որպես ընդունելի՝ խոսքի ազատության տեսանկյունից»,- ասաց Վարդանյանը։
Նա դադարեցրեց ճեպազրույցը՝ լրագրողների մյուս հարցերը թողնելով անպատասխան:

***

«Զղջո՞ւմ եք Ֆեյսբուքում արցախցիների հասցեին ատելության խոսք տարածելու համար»,- հարցն ուղղվեց ԲԴԽ խորհրդի անդամի թեկնածու, փաստաբան Ալեքսանդր Սիրունյանին։ Ի պատասխան՝ ասաց. «Այս պահին մեկնաբանություններ չունեմ, թողեք անցնեմ: Ավարտենք, հետո զրուցենք»:
Հարցին՝ ծանո՞թ է քաղհասարակության ներկայացուցիչների՝ իր նկատմամբ հնչող քննադատությանը, արձագանքեց. «Ես ուրախ եմ, որ մենք ունենք քաղհասարակություն»:

Հիշեցնենք, որ հասարակական մի շարք կազմակերպություններ հայտարարություն էին տարածել Բարձրագույն դատական խորհրդի անդամի թեկնածու Ալեքսանդր Սիրունյանի առաջադրման վերաբերյալ՝ դատապարտելով «մեծամասնություն ունեցող քաղաքական կուսակցության կողմից ԲԴԽ անդամի պաշտոնում իր քաղաքական կուսակցական անդամի և անբարեվարք անձի առաջադրելու մոտեցումը և պահանջելով չեղարկել ՀՀ Ազգային ժողովի նախագահի համապատասխան որոշումը»։