«ԵԽԽՎ-ում Հայաստանի վերաբերյալ զեկույց կազմողներին ես զգուշացրի, որ չի կարելի զեկույցում գրել, որ լարվածություն կա պետության առաջնորդի և եկեղեցու միջև»,- Ստրասբուրգից հրապարակած իր տեսաուղերձում նշեց ԼՀԿ նախագահ Էդմոն Մարուքյանը:

«Ի՞նչ է նշանակում միջև` «between»: Սա նշանակում է, որ նրանք հավասարազոր են, մինչդեռ Ալեն Սիմոնյանը կամ որևէ այլ ՔՊ-ական Խոր Վիրապի զնդանում փակված չէ: Եկեղեցին չունի նման լիազորություն: Մինչդեռ իշխանություններն ունեն նման լիազորություն և սրբազաններն ու մյուս հոգևորականները ԿԳԲ-ի բանտում են: Այսինքն, բացատրեցի, որ հավասարության նշան դնելը սխալ է, իրականում տեղի է ունենում հետևյալը` երկրի իշխանությունը վարչապետի գլխավորությամբ ՀԱԵ-ն նշանակել է իր թշնամին, հետո` պետության թշնամի և պետության ամբողջ ռեսուրսն ուղղել այդ ինստիտուտի դեմ: Այսպես գործում է ցանկացած դիկտատոր: Այդ զեկույցը չպետք է նման ձևով լույս տեսներ»,- ասաց Մարուքյանը: