«Այսօրվա մեր ընտրողն ուղղակի տեղյակ էլ չէ Սահմանադրության բովանդակությունից»,-այսօր՝ լրագրողների հետ հանդիպման ժամանակ խոսելով սահմանադրական փոփոխություններից՝ ասաց ՀԴԿ նախագահ Արամ Սարգսյանը՝ շարունակելով.
«Ես բազմիցս հայտարարել եմ, որ անընդունելի է ամենը, ինչ վերաբերում է մարդու իրավունքներին: Չկա որևէ ապահովվածություն՝ դրանք իրականացնելու համար: ՉԻ կարող հռչակվել սոցիալական պետություն, որտեղ իրավունքը մնում է օդում կախված: Անհասկանալի է նաև «առնվազն 101» պատգամավոր հասկացությունը: Խոսքս հիշեք, ռեյտինգային քվեարկություն է լինելու շրջաններում: Օլիգարխները կրկին կանցնեն խորհրդարան: Կարծում եք՝ գնալու են կոալիցիա ձևավորե՞ն: Ոչ մի դեպքում: 40 տոկոս եթե հավաքեն, անպայման պատճառ կգտնեն, կասեն, որ կոալիցիան չի ստացվում, գնում ենք 2-րդ փուլ ու 30 մանդատ գրպանից կհանեն, որպեսզի ապահովեն 54 տոկոսը: Աշխարհում չկա նման արհեստական կայունություն ձևավորելու փորձ: Քվեն եթե չեք ստացել, բարի եղեք՝ կրկին ընտրություններ կազմակերպել: Էն մարդը ճիշտ բան է ասել՝ Սահմանադրությունը փոխելու տեղը ձեզ փոխեք: Իդեալականացրե՛ք ներկայիս Սահմանադրությունը, ոչ թե նորը բերեք»:
Արամ Սարգսյանի կարծիքով՝ եթե «ոչ»-ը շատ լինի, ապա իշխանությունը դեղին քարտ կստանա.
«Նշանակում է՝ ժողովուրդը դժգոհ է նրանց վարած քաղաքականությունից: Երեկ գյուղ եմ գնացել: Ջարդած տան վրա գրել են՝ «Ասա՛ այո: Ճանապարհները քարուքանդ, մարդիկ աշխատանք չունեն, ասում են՝ «Ասա՛ այո», ինչի՞ն ասեն այո: Կարծում եմ՝ նորից լցոնումներով են անելու: Մեր գրասենյակի կողքին շտաբ կա, սխալմամբ մեզ մոտ են գալիս ու հարցնում. փողը ձեզ մո՞տ են տալիս: Եթե այսպես պետք է շարունակվի, վայ մեզ, վայ մեր պետությանը»,-նկատեց ՀԴԿ նախագահը:
ՀՅԴ պատգամավոր Արծվիկ Մինասյանը համաձայնեց Արամ Սարգսյանի հետ.հանրային քննարկումները քիչ են.
«Դրանում բոլորն են մեղավոր»,-ասաց նա:
Ինչ վերաբերում է սահմանադրական փոփոխություններին՝ նկատեց.
«Իշխանությունների փոփոխման առաջին մեխանիզմը նոր Սահմանադրությունն է, իսկ երկրորդ մեխանիզմը Մարտի 1-ն է: Հիմա մենք նոր Մարտի 1 ենք ուզում, թե սահմանադրական կարգով իշխանափոխություն: Առաջին անգամ ընդերքն ու ջրային ռեսուրսները պետության բացառիկ սեփականությունն են ճանաչվում, ամրագրվում է սոցիալ-դեմոկրատական արժեքների հիմքը, կիրառելի մեխանիզմ են դարձնում սոցիալական իրավունքները՝ դատական պաշտպանության վերջնական մեխանիզմով: Գործող Սահմանադրության մեջ գրված է բնակարան ունենալու իրավունքը, որն այդպես էլ իրացված չէ: Ցանկացած քաղաքացի չի կրող վկայակոչել մեկ դեպք, որ դատական կարգով կարողացել է բնակարան ստանալ՝ այս նորմի հիման վրա: Առաջարկվող փոփոխությունը օրենքի իրացումը կապում է մարդու կարիքի հետ և դա ճիշտ է: Պետք է բնակարան ստանա այն քաղաքացին, ով ունի դրա կարիքը: Ինչ վերաբերում է «առնվազն 101» պատգամավորին, ապա ողջամտությունն ասել է, որ ներկայիս թվից շատ չենք կարող ունենալ»:
Անի Կարապետյան
Մանրամասները՝ տեսանյութում
