«Աշխարհի բոլոր կառավարությունները դանդաղ են աշխատում։ Մեր կառավարությունն աշխարհի բոլոր կառավարություններից ավելի դանդաղ է աշխատում՝ մի պարզ պատճառով, որ երկու պարամետրով զիջում ենք աշխարհի լավագույն կառավարություններին, առաջինը՝ մեր կադրերի պրոֆեսիոնալիզմով, երկրորդ՝ աշխատանքի վարձատրության չափով»,- Շվեյցարիայի հայության մի խումբ ներկայացուցիչների հետ հանդիպման ժամանակ ասել է ՀՀ վարչապետ Նիկոլ Փաշինյանը՝ հավելելով, որ ՀՀ-ում կրթության մակարդակն այնպիսին չէ, որ կարողանա պետության համար պատրաստել արժանի պրոֆեսիոնալության կադրեր, իսկ նրանք, ովքեր այդպիսին են, դժվար է համոզել 300-400 հազար դրամով աշխատել․ մասնավոր հատվածում կարող են տասն անգամ ավելի բարձր աշխատավարձ ստանալ։

«Ինձ դերակատարում է բաժին հասել, որ պետք է խոսեմ բաների մասին, որ ընդունված չէ մեր իրականության մեջ խոսել»,- Շվեյցարիայի հայության մի խումբ ներկայացուցիչների հետ հանդիպման ժամանակ ասել է Նիկոլ Փաշինյանը՝ անդրադառնալով ՀՀ-ում ընդդիմության՝ իրեն ուղղված քննադատություններին․ «ԱԺ-ում մեր ընդդիմադիր գործընկերներն ասում են՝ դուք մեր հերոսներին վարկաբեկեցիք, ես էլ ասում եմ՝ ո՞ր հերոսներին, որ կռվից հետո ավտոմատն ուսին մտնում էին մի գործարան, ասում՝ շուտ դուրս եկեք, էդ գործարանն այլևս ձերը չի, մերն է»։

«Մարդիկ ՀՀ-ում ասում են՝ ոստիկանությունը բիրտ է, ապօրինի, ինչ ասես՝ մեր ոստիկանության գլխին լցնում են, հետո բարեկամը որ գնում է ԱՄՆ, ասում է՝ լսի, զգույշ կլինես, ստեղ ՀՀ-ն չի, եթե police-ն կանգնացնի, սուս կմնաս, բան չասես»,- Շվեյցարիայի հայության մի խումբ ներկայացուցիչների հետ հանդիպման ժամանակ, զուգահեռներ անցացնելով ՀՀ և ԱՄՆ հասարակության միջև, ասել է Նիկոլ Փաշինյանը։ «ՀՀ-ում պարեկը մեկին կանգնացնի, կհանեն, կմտնեն ուղիղ եթեր՝ ինչո՞ւ կանգնացրիր, դու ո՞վ ես ընդհանրապես, ԱՄՆ-ում կարան տենց բան անե՞ն։ Գնացեք, ամերիկացի ոստիկանի դեմը էդ ուղիղ եթերի լայվը միացրեք, տենանք՝ ձեզ հետ ինչ տեղի կունենա»,- հավելել է ՀՀ վարչապետը։