Վերջին՝ ապրիլի 12-ի ակցիայից հետո «Դ!ԵՄ ԵՄ»-ը հայտարարեց «Դ!ԵՄ ԵՄ» համակարգ ստեղծելու մասին՝ նպատակ ունենալով շարժումը դարձնել ավելի զանգվածային:

Համակարգի ստեղծման նպատակների, պայքարը ճնշելու փորձերի և այլ հարցերի շուրջ ASEKOSE.am-ի թղթակիցը զրուցել է «Դ!ԵՄ ԵՄ» նախաձեռնության անդամ Հայկ Ավետիսյանի հետ.

-Նախ խոսենք «Դ!ԵՄ ԵՄ» համակարգ ստեղծելու նպատակների մասին:

-Այս պահին «Դ!ԵՄ ԵՄ»-ը կառույց չէ, այլ նախաձեռնություն, որը համակարգված, կազմակերպված ցանցային ձևով դեռ չի տարածվել: «Դ!ԵՄ ԵՄ» համակարգի ստեղծման նպատակն է, որ բոլոր  տեղերում,  աշխարհագրական վայրերում՝  Երևանում,  թե մարզերում,  գործեն խմբեր, որոնք ակտիվ աշխատում են: Այս պահին նման խմբեր գոյություն ունեն, և դրանց քանակությունն ավելացնելու նպատակով «Դ!ԵՄ ԵՄ» համակարգի  այս կառուցվածքն ենք մենք առաջարկել: Եթե մարդիկ ավելի հետաքրքիր եղանակ գտնեն, կարող են առաջարկել: Դա վերջնական չէ,  կարող է զարգանալ և ընդլայնվել: Պետք չէ, որ ամբողջ ծանրաբեռնվածությունը մի խմբի վրա լինի: Եթե այլ խմբեր ևս աշխատեն, ցանցային եղանակով լուրջ աշխատանք կկատարվի: Այսինքն՝  մարդիկ,  ովքեր շահագրգռված են,  մտահոգ են այս խնդրի վերաբերյալ, իրենց տեղերում կաշխատեն ու քննարկումների արդյուքնում օգտակար գաղափարներ  կծնվեն: Համակարգված աշխատանքն, անշուշտ, օգտակար կլինի:  

-«Անտարես»-ի նախադեպն, անշուշտ,  ոգևորիչ էր: Հետաքրքիր է՝ կա՞ն կազմակերպություններ,որոնք հետևեցին այդ օրինակին ու թեև պաշտոնապես չեն հայտարարել, բայց խուսափում են պահումներ անել:

-Իհարկե կան, եթե հետևում եք մեր  Ֆեյսբուքյան էջին, պարբերաբար նշվում են կազմակերպությունների անուններ: Օրինակ՝  «Արմենալ»  ընկերության աշխատակիցներից մեկը գրել էր, որ նույնիսկ   անցած երեք ամիսների ընթացքում աշխատավարձերից կատարված պահումները  վերադարձվել են: Եթե չեմ սխալվում՝ ընդհանուր առմամբ՝ այդ ցուցակում 30  գործատուների անուններ կան: Բացի դրանից՝ ապրիլի 12-ին  ինֆորմացիոն տեխնոլոգիաների ձեռնարկությունների միության գործադիր տնօրեն Կարեն Վարդանյանը հայտարարեց, որ  IT ընկերությունները ցանկանում են  միմյանց միջև պայմանավորվածություն ձեռք բերել,  ընդհանուր հայտարարությամբ հանդես գալ, որ իրենք պահումներ չեն կատարելու: Հայտարարությունն այս պահին չկա, բայց աշխատում են այդ ուղղությամբ:

-Ձեր  ցույցերին բազմաթիվ աշխատող քաղաքացիներ են մասնակցում: Իսկ ցույցերը հիմնականում  աշխատանքային ժամերին են կազմակերպվում: Գործատուների և աշխատողների միջև տարաձայնություններ չե՞ն առաջանում: Դուք տիրապետու՞մ եք նման տեղեկատվության:

- Չեմ կարող հստակ ասել, բայց տեղյակ եմ, որ  պետական շատ կառույցներում՝ մասնավորապես դպրոցներում, ուսուցիչներին արգելել էին մասնակցել ցույցերին: Այնուամենայնիվ, փետրվարի   6-ից սկսած՝  մեր ցույցերին ուսուցիչներ և դասախոսներ են մասնակցում: Հունվարի 24-ին՝ ՍԴ-ի կողմից կասեցումներ անելուց հետո, այնուամենայնիվ պահումներ արվեցին:  Ուսուցիչներին ճնշել էին ԳԿՆ մասշտաբով: Մարդիկ ահազանգել էին ֆեյսբուքյան խմբում: Այդ պատճառով հենց  ԿԳՆ-ից սկսվեց  փետրվարի 6-ի ցույցը: Այդ օրվանից մեր շարքերում ավելացավ   կրթության  ոլորտի աշխատողների թիվը: Հետևանքներից մինչ օրս ինձ  3 դեպք է միայն հայտնի: Խոսքս մետրոպոլիտենի աշխատակիցների մասին է: Իսկ մյուս դեպքերում եղել են միայն վախեցնելու ու ճնշելու փորձեր,  որ մարդիկ ցույցերի չմասնակցեն:

-Պայքարը ճնշելու փորձեր այնուամենայնիվ եղան: Հիշենք դատախազության հայտարարությունը, որտեղ  նշվում էր, որ ճանապարհ փակելը և երթևեկությանը խոչընդոտելը առաջ է բերում քրեական և վարչական պատասխանատվություն: Ինչպե՞ս եք վերաբերվում նման քայլերին.  դրանք թուլացնու՞մ, թե՞ ուժեղացնում են պայքարի ոգին:

-Մենք ցանկացած գործողությունից առաջ նախապես հայտարարում ենք՝ ամեն ինչ անելու ենք, որ մեր գործողությունները լինեն օրենքի սահմաններում: Նախևառաջ, որևէ մեկս քրեական հանցագործություն չենք կատարում, չենք դրդում նաև մարդկանց: Պայքարի՝ ամբողջ աշխարհում ընդունված եղանակներից մեկը խաղաղ անհնազանդությունն է: ՀՀ դատախազությունը  մեր հանցագործ իշխանություններին պետք է քրեական պատասխանատվության ենթարկի: Մենք գիտենք մեր իրավունքները, գիտենք օրենքները:  Գիտենք, որ տվյալ դեպքում փողոց փակելը քրեական պատասխանատվություն չի ենթադրում: Առհասրակ, հանրային խաղաղ անհնազանդությունը չի ենթադրում քրեական պատասխանատվություն: 

- «Դ!ԵՄ ԵՄ»-ը  բազմիցս հայտարարել է, որ քաղաքական գործընթացներից հեռու է: Շատերը հիացմունքով են խոսում  «Դ!ԵՄ ԵՄ» -ի անդամների սկզբունքայնության մասին, որ շարժումն  ի սկզբանե ինքնաբուխ է, որևէ մեկի կողմից  ուղղորդված չէ: Անկախ այս պայքարի արդյունքներից՝ հետագայում և՞ս զերծ կմնաք քաղաքական գործընթացներից:

-Այս պահին նման ծրագրեր մենք չունենք: Ապագայի համար ոչինչ չեմ կարող ասել, կամ բացառել:  Ոչ ոք չի կարող ասել, թե ինչի անհրաժեշտություն կլինի: Մի բան ակնհայտ է՝ եթե ՀՀ-ում դադարեցվի պայքարը, կգործի ամենավատ  սցենարը, քանի որ կանգնած ենք կործանման եզրին: ՀՀ իշխաություններն ուղղակիորեն  կեղեքում են ժողովրդին: Փաստացի դա է իրականությունը: Պետք է օգտագործել ցանկացած միջոց՝ իհարկե օրենքի սահմաններում, որպեսզի պայքար ծավալենք և ժողովրդին ոտքի հանենք: Որ մարդիկ գիտակեցեն իրենց իրավունքների համար պայքարելու անհրաժեշտությունը, ոչ թե հեռանան Հայաստանից:  Դա է մեր խնդիրը, մեր երազանքը:

- Նոր վարչապետից ու նոր ձևավորվելիք կառավարությունից ակնկալիքներ կա՞ն:

-Մեզ համար քաղաքական խաղաքարերի փոփոխությունն էական չէ: Կարևոր է, որ երկրում փոփոխություններ լինեն:  Մեր օրակարգում  երբեք չի եղել կոնկրետ մարդկանց հրաժարականի հարցը: Ով ինչ պաշտոն կստանա, մեզ առանձնապես չի հետաքրքրում:

Հեղինակ՝ Հասմիկ Գյոզալյան