Արդեն տևական ժամանակ Հ2-ով ցուցադրվող «Glendale Life» ռեալիթի շոուն հայկական հեռուստաեթերում ցուցադրվող ամենաքննադատված նախագծերից մեկն է: Ավելին` ըստ համացանցային օգտատերի` տվյալ շոուն խայտառակություն է, որը պետք է արգելել, քանի որ դրա` ամերիկաբնակ հայ մասնակիցները ոչ միայն արհամարհում են հայկական վարքն ու բարքը, այլև այլանդակություն են քարոզում: Այս առիթով «Հեռուստաեթերի մաքրման պահանջ» նախաձեռնությունն ահազանգել է այն մասին, որ «Glendale Life»-ը նպաստում է երեխաների արժեհամակարգի խեղմանը և մեծահասակների դեգրադացմանը.
«Մեր կողմից նշված հաղորդումը հեռարձակվում է ժամը 22:00-ին: Բացի այդ, օրվա ընթացքում անընդունելի անոնսներ են ցուցադրում: Սա վտանգավոր է ոչ միայն երեխաների ու երիտասարդների արժեհամակարգի խեղման համար, այլև մեծահասակների դեգրադացման համար նույնպես: Հեռուստաընկերություններով եթեր տրվող հաղորդումները պիտի կրթող, դաստիարակող, համամարդկային և ազգային բարձրագույն արժեհամակարգ ձևավորելու նշանակություն ունենան, ոչ թե բարոյալքեն հասարակությունը:Մենք կարծում ենք, որ նման հաղորդումները ոչ միայն պիտի արգելվեն, այլև դրանք եթեր հեռարձակողներին պիտի ենթարկել հասարակական և քրեական պատասխանատվության»,-նշվում էր հայտարարությունում:
Asekose.am-ի ունեցած տեղեկություններով` «Glendale Life»-ի մի քանի մասնակիցներ այժմ Հայաստանում են և այստեղ նկարահանում են իրենց աղմկահարույց ռեալիթի շոուի որոշ հատվածներ: Հատկանշականն այն է, որ մասնակիցները, ըստ ականատեսների, հայրենիքում, նաև կադրից դուրս, իրենց պահում են նույնքան անկաշկանդ ու երբեմն` գռեհիկ ու սանձարձակ, որքան` կադրում:
Մի խոսքով` շոուն շարունակվում է... միայն այն տարբերությամբ, որ այս անգամ Glendale Life-ն արդեն հայրենիքում: