Բիոզուգարանային սպառնալիք
Թմրանյութեր տեղափոխելու համար կալանավորված Դավիթ Վարդանյանի հայրը՝ Սպորտի եւ երիտասարդության հարցերի նախարար Յուրի Վարդանյանը, թեեւ հրաժարական տալու մտադրություն չունի, բայց երկար ժամանակ խուսափում էր երեւալ հանրային տարածքում, մասնավորապես Ազգային ժողովում:
Բյուջեի քննարկումների ժամանակ վերջապես հայտնվելով խորհրդարանում և փորձելով խուսափել լրագրողների հարցերից՝ ասաց, թե «գնում է զուգարան»: Շմայսից հետո, պարզվեց էս «մոքիրի փորն էլ լավ չի», ավելին՝ քննարկման սենյակից դուրս եկավ իրապես մի «մոքիրի» հետ, մի կնոջ, որը պետք է օլիմպիական չեմպիոնին պաշտպաներ լրագրողներից:
Այնուամենայնիվ, նախարար Վարդանյանը մի հարցի պատասխանեց: Որդու հանրային պաշտպանը ասել էր, որ Դավիթ Վարդանյանը հայերեն գրել-կարդալ լավ չգիտի: Այս մասին հարցը լսելով՝ Յուրի Վարդանյանը անմիջապես նետեց. «Գլուխը քարին է տվել»:
Ինչպես հայտնի է, «սոված, թշվառ, անտեր ու անփող» Վարդանյանների ընտանիքը իրենց որդու համար հանրային պաշտպան է գտել: Եվ ահա, նախարարն այսպես է արձագանքում 70-ամյա հանրային պաշտպանի ասածին, ով միամտություն է ունեցել անկեղծանալ եւ ասել ճշմարտությունը, որ թմրաբիզնեսում ներգրավված Դավիթը հայերենին լավ չի տիրապետում:
Պարզվեց՝ հանրային պաշտպանն իր հայտարարությամբ «թասիբի է գցել» Յուրի Վարդանյանին, ով այսօր հրաժարվել է անվճար ծառայություններից եւ որդու համար նոր պաշտպան է ընտրել: Վճարովի:
Դեռ անունը չեն նշում: Ով գիտե, գուցե ընտրել է Լիսկայի որդու պաշտպանի՞ն, կամ նման մեկին, որը մի քանի ամսից իր որդուն էլ կհանի մեկուսարանից:
Էս էլ «փող չունեցող» նախարարը, ով ավելի վաղ հայտարարել էր, թե «չի խառնվում» իր որդու նկատմամբ հարուցված քրեական գործին:
Աղբյուր` 7or.am
