Սրտի խոր վրդովումով եւ զարմանքով կարդացինք հայրենի Հետք (hetq.am) կայքի 3 Սեպտեմբեր 2014-ի անտեղի եւ ժամանակավրէպ ինչպէս նաեւ չափազանց մտահոգիչ ու իր նպատակով կասկածելի  գրառումը ինչ կը վերաբերի հրատարակման համար ընտրուած անոր պահին:

Արդարեւ վերոյիշեալ կայքին վրայ քանի մը օր առաջ հրատարակուած էր Լեռ Կամսարի 1945-ին գրուած  մէկ (ըստ կայքին) անտիպ՝ «Անմիաբանություն հայոց պատմության սկզբէն մինչև վերջ» խորագրով յօդուածը, որ նուազագոյնը կարելի է կոչել ատելութեան գրականութիւն (hate literature) իր տեսակին եւ որակին մէջ :

Հայոց Ցեղասպանութեան 100-ամեակի սեմին եւ նամանաւանդ Հայրենիք-Սփիւռք 5-րդ Համաժողովին նախօրէին նման «անտիպ» մը փոշիներէն դուրս հանելով հրատարակելը վտանգաւոր երեւոյթ մըն է եւ չարտացոլացներ իրականութիւնը, ոչ միայն իր անարդար եւ աժան ընդհանրացումներով լեցուն եւ ոչ-գիտական բովանդակութեամբ այլ նաեւ կը հակասէ Հայ աւանդական երեք կուսակցութիւններու ներկայի միաբան եւ համերաշխ գործելաձեւը ինչ կը վերաբերի Հայ ժողովուրդի գերագոյն շահերուն:

Լեռ Կամսար իր ատենի յօդուածին մէջ բաւական մը նսեմացնելէ ետք Հայ տոհմիկ նախարարութիւնները, ըրած է հետեւեալ նմանութիւնը. «Հիմա՝ ճիշտ է չկան նախարարությունք, բայց կան կուսակցություններ, որոնք կներկայացնեն այդ նախարարությունները»։ Ըստ Լեռ Կամսարի ատենի մտքին՝ ռամկավար կուսակցությունը ապազգային կուսակցութիւն մըն է. «որուն անդամները բոլորն աղաե, փաշաե, բոլորն խելոք փողատերեր են, չափված, ձևված կենցաղով» եւ կ՛եզրակացնէ թէ «Հայությունը կատարյալ ազգ շինելու համար, պէտք է ռամկավարներու գլուխները կտրել դաշնակցության սիրտին դնել… Ու քանի որ այդ անկարելի է՝ երկու ազգ ծնվեր ենք, երկու ազգ ալ կմեռնենք»։

Վերոյիշեալ յօդուածին հրատարակութիւնը այսօր այս պահուս ոչ միայն կ՛ընդվզեցնէ Ռամկավար Ազատականներս ի Հայաստան եւ ի սփիւռս աշխարհի, այլ՝ աւելի քան վստահ ենք, թէ նոյնքան կ՛ընդվզեցնէ մեր քոյր կուսակցութեանց ղեկավարութիւնն ու շարքայինները, որոնց անունով ալ այսօր՝ այս յօդուածով համարձակութիւնը կ՛ունենանք արտայայտուելու:

Ճիշդ է, որ ատենին կամայ թէ ակամայ գործուած են սխալներ բոլորիս կողմէ, սակայն այդ սխալները, որոնք միշտ ալ ենթակայ են ինքնաքննադատման սկսելով մեզմէ, ոչ մէկ ձեւով կարելի է ընդհանրացնել եւ ճակատագրական ու յաւիտենական անհամերաշխութեան բնոյթ տալ անոնց՝ այսօր հրատարակելով նման ոչ-կառուցողական եւ անցեալի փոշիներուն միայն պատկանող յօդուածներ:

Հայոց պատմութիւնը լեցուն է Հայ կուսակցութեանց միակամ պայքարի եւ աշխատանքի օրինակներով սկսելով անոնց անզուգական գործակցութեամբը  կազմակերպուած Վանի երկու ինքնապաշտպանութիւններով, որուն սիրոյն հայրենի հողին վրայ քով քովի նահատակուած են Դաշնակցական, Հնչակեան, Արմենական եւ Ռամկավար ազատամարտիկներ, անցնելով Սարդարապատէն՝ հասնելու համար մերօրեայ համերաշխ եւ ներդաշնակ գործակցութեան ամէն առիթով եւ ամէն մակարդակի վրայ՝ յանուն Հայ ժողովուրդի գերագոյն շահերուն:

Հետեւաբար, յարգելով հանդերց hetq.am կայքի սեփականատէրերը, խմբագրութիւնն ու անոր Հայ լուր սփռելու այլապէս վեհ առաքելութիւնը, խնդրոյ առարկայ յօդուածին նման հրապարակումին պարագային համար կ՛ուզենք յստակօրէն հաստատել  հոս, թէ «Հետք»-ին եւ «հետքերուն» անպատասխանատու գրառումները ըլլան անոնք, տգիտութեան արդիւնք, կամ բարձր rating եւ կայքի traffic-ի ապահովելու աժան նպատակներով կատարուած եւ կամ ինչու չէ՝ չարամտութեամբ կազմակերպուած, ոչ մէկ ձեւով կրնան խաթարել Հայ աւանդական երեք կուսակցութեանց շրջահայեաց եւ հեռատես ղեկավարութեան եւ պատասխանատու շարքայիններու  գործելաձեւը վստահեցնելով մօտիկին թէ հեռուին, թէ մենք միաբան ենք այսօր եւ միաբան ալ պիտի մնանք մինչեւ վերջ:

Սևակ Յակոբեան

Աղբյուրը՝ www.ragmamoul.net