Միքայել սրբազանի գործով Վերաքննիչ քրեական դատարանում քննվեց նախագահող դատավոր Էդգար Մանասյանի բացարկի միջնորդությունը։ Պաշտպաններից Արա Զոհրաբյանը նշեց, որ բացարկի պատճառը գործով դատախազ Վահան Հարությունյանի հետ դատավորի ունեցած ընկերական կապն է։

Արա Զոհրաբյանը հավելեց, որ պաշտպանական կողմը վերապահում ունի նաև գործով մյուս դատավոր Վաչե Մարգարյանի հետ կապված, սակայն նրա նկատմամբ բացարկի միջնորդություն չեն ներկայացնում, քանի որ եթե նախագահողի բացարկի միջնորդությունը հաստատվի, դատավորների ամբողջ կազմը պետք է փոխվի։
Դատարանը մերժեց միջնորդությունը։ Այսպիսով՝ Միքայել սրբազանի վերաքննիչ քրեական բողոքը կքննեն դատավորներ Վաչե Մարգարյանը, Նարինե Հովակիմյանը և նախագահող Էդգար Մանասյանը։

***

Վերաքննիչ դատարանում Միքայել արքեպիսկոպոս Աջապահյանի գործի քննության ժամանակ պաշտպանական կողմը ներկայացրեց Միքայել Սրբազանի կալանքը վերացնելու միջնորդություն։ Դատական նիստի ավարտին նախագահող դատավոր Էդգար Մանասյանը հայտարարեց, որ Սրբազանի կալանքը վերացնելու միջնորդության վերաբերյալ որոշում դեռևս չի հրապարակվում, դատարանն այդ միջնորդությանը կանդրադառնա նաև հաջորդ դատական նիստում, որը կկայանա փետրվարի 6-ին։

Հիշեցնենք, որ Միքայել սրբազանը դատապարտվել է 2 տարվա ազատազրկման՝ իշխանությունը զավթելու հրապարակային կոչի համար։ Նա մեղադրվում է, որ «ունենալով մեծաթիվ կողմնակիցներ, 2024 թվականի փետրվարի 3-ին, ապա 2025 թվականի հունիսի 21-ին, ԶԼՄ ներկայացուցիչների հետ հարցազրույցներում հրապարակայնորեն կոչ է արել զավթել իշխանությունը»։ Փաստաբաններն ու դատախազությունը դատական ակտը բողոքարկել են Վերաքննիչ դատարանում։

Սրբազանն ունի առողջական խնդիրներ, և փաստաբանները պնդում են, որ կալանքը թույլատրելի խափանման միջոց չէ։