Որևէ մեկին պաշտպանելու կամ փնովելու նպատակ չունեմ, բայց չեմ էլ կարող հանդուրժել, երբ խեղաթյուրում են Գորիսի 3-րդ գումարտակի պատմությունը, երբ Սամվել Հարությունյանի նմանները վիրավորում են հայրենասեր ազատամարտիկների անունը, պատիվը, ոտնահարում Սյունեցուն բնորոշ ավանդույթները:

Ծնվել և ապրում եմ, ազատագրական պայքարի ավանդույթներով հարուստ Գորիս քաղաքում: Ղարաբաղյան շարժման առաջին իսկ օրից զենք եմ վերցրել, կազմակերպել առաջին մարտական ջոկատը մեր տարածաշրջանում, իմ ընկերների հետ մասնակցել ռազմական գործողություններին`մինչև պատերազմի հաղթական ավարտը: Քաղաքականությամբ չեմ զբաղվում: Իմ կուսակցությունը իմ մարտական ընկերներն են, իմ ժողովուրդը:

Սամվել Հարությունյանը առանց ամաչելու ներկայանում է իբրև Գորիսի` տարածաշրջանի «ինքնապաշտպանության կոմիտեի համանախագահ» և ճառում` թե այս կամ այն հրամանատարը, ազատամարտիկը չի մասնակցել  ոչ մի ռազմական գործողության, պատերազմի հետ կապ չունի, միայն զբաղվել է թալանով և այլն: Նման արտահայտությունները  ամենից առաջ վիրավորական է հենց մեզ` ազատամարտիկներիս համար:

Գորիսի տարածաշրջանի մարտական ջոկատները միավորվել էին 3-րդ պայմանագրային գումարտակի մեջ: Ամբողջ հանրապետությունը գիտի, Ղարաբաղյան պատերազմի հրամանատարները գիտեն, թե ինչ կարևոր դեր է խաղացել այդ գումարտակը իր հրամանատարի հետ միասին  ռազմական գործողությունների ընթացքում:

Տարիներ շարունակ Ս. Հարությունյանը, որտեղ որ ելույթ է ունենում, ինքը իրեն ներկայացնում է որպես «Գորիսի ինքնապաշտպանության կոմիտեի համանախագահ» և իր բնավորությանը համապատասխան փորձում շահարկել ինքնապաշտպանության գործը: Սա ինչ պաշտոն է, ով է հորինել այն: Գորիսում ձևավորված էր ինքնապաշտպանության խորհուրդ, որի նախագահն էր Համլետ Մկրտչյանը, տեղակալը` Միշա Խոյլունցը, մատակարարման գործը իրականացնում էի ես:

Թե ի՞նչ համանախագահ` Ս. Հարությանի մասին է խոսքը, չգիտեմ:

Ստելը տղամարդուն վայել չէ, սակայն նրանից ի՞նչ .... :

Կամ նա խոսում է հրամանատարների, ազատամարտիկների և մյուսների թալանի մասին: Պատերազմի տարիներին, երբ գորիսեցին հազիվ քարշ էր տալիս իր գոյությունը, Ս. Հարությունյանը իր հայրական համեստ տան կողքին մի հսկա տուն կառուցեց: Այդ ինչպե՞ս կարողացար: Ի՞նչ փողերով` գողացված, թալանված, թե օգնության եկած փողերով: Չեմ կարող ասել:

Իրեն հայրենասեր է ներկայացնում: Եթե իրականում հայրենասեր մարդ է, ինչու՞ քաղաքապետի պաշտոնից զրկվելուց հետո անհետացավ: Հենց դրանից հետո Գորիսի սահմանների երկայնքով ռազմական գործողությունները թեժացան: Ի՞նչ է հայրենասիրությունը միայն պաշտոն զբաղեցնելու դեպքու՞մ է բռնկվում:

Անհետացավ և հետո սկսեց Գորիսում հայտնվել ընտրություններից-ընտրություն, իսկ քելեխների ու քառասունքների արարողությունները օգտագործում էր քաղաքական, քարոզչության նպատակներով:

ԵԿՄ Գորիսի տարածքային բաժանմունքի նախագահ

Ազատամարտիկ, փոխգնդապետ Սուրիկ Բաղդասարյան