«Ադրբեջանում գերեվարված Չինարիի բնակիչ 31-ամյա Կարեն Պետրոսյանին՝ դիվերսանտ ներկայացնելու ադրբեջանական ԶԼՄ-ների տարածած տեսանյութը վատ կազմակերպված շոու է»,-այս մասին ASEKOSE.am-ի թղթակցի հետ զրույցում նշեց ՊՆ մամուլի խոսնակ Արծրուն Հովհաննիսյանը:
Արծրուն Հովհաննիսյանի խոսքով՝ Կարեն Պետրոսյանը կրում է ադրբեջանական համազգեստ: Ցույց են տալիս հեռախոս, որով անհնար է նման լուսանկարներ ստանալ, որոնք երևում են տեսանյութում:
Ինչ վերաբերում է իբր Կարեն Պետրոսյանի մոտ հայտնաբերված զենքերին՝ մամուլի խոսնակի խոսքով՝ դրանք բոլորովին նոր, չօգտագործված զենքեր են, որոնց վրա անգամ փոշի չկա:
Հիշեցնենք՝ նախօրեին հայտնի դարձավ, որ սահմանամերձ Չինարի գյուղի բնակիչ Կարեն Պետրոսյանը գերի է վերցվել ադրբեջանցիների կողմից: Չինարիի գյուղապետի հավաստմամբ` Պետրոսյանը էշով գնացել է անտառ` փայտի, եւ մոլորվելով` անցել է սահմանն ու հայտնվել ադրբեջանական գյուղում:
Ադրբեջանական լրատվամիջոցները նախ տարածեցին Կարեն Պետրոսյանի լուսանկարը, ապա նրան ներկայացրին որպես դիվերսանտ: Իսկ այսօր արդեն տարածեցին ծանոթ տեսանյութը, որտեղ ՀՀ քաղաքացին ակնհայտ ճնշումների է ենթարկվում:
