Վայոց ձորի մարզպետը վերջերս հաղորդագրություն էր տարածել, համաձայն որի աշխարհագրական տեղաններում կատարվել են համապատասխան փոփոխություններ և Սելիմի լեռնանցքն այսուհետ կոչվում է Վարդենյաց լեռնանցք, իսկ Սելիմի քարավանատունը` Օրբելյանների քարավանատուն:
ASEKOSE.am-ի թղթակցի` երբվանի՞ց կար Սելիմի լեռնանցքի անունը փոխելու գաղափարը, ինչի՞ հետ է կապված անվանափոխությունը, արդյո՞ք այն պաշտոնապես անվանափոխվելու է հարցերին անդրադառնալով Վայոց ձորի մարզպետ Էդգար Ղազարյանը պատասխանեց.
«Գաղափարը նոր չէ: Սելիմի լեռնանցքը Վարդենյաց լեռանցք անվանափոխելու որոշումն ընդունվել է դեռևս 2006 թվականի դեկտեմբերի 21-ին ՀՀ կառավարության թիվ 1905-Ն որոշմամբ և մեր խնդրանքն է, որ այն մտնի գործնական կիրառության մեջ»:
Ինչ վերաբերում է հարցին, թե ինչո՞ւ Վարդենյանց լեռնանցք, Վայոց ձորի մարզպետը նշեց.
«Վարդենյաց լեռնանցքն իբրև տեղանուն սահմանված է ՀՀ Գեղարքունիքի մարզի օբյեկտների ցանկում: ՀՀ Վայոց ձորի մարզում Սելիմ անվամբ կան մի շարք օբյեկտներ: Մենք նախաձեռնություն ենք հանդես բերել, որպեսզի Սելիմի քարավանատունը փոխարինվի Օրբելյանների քարավանատուն, իսկ Սելիմ անունով մյուս օբյեկտները (գետ, խաչքար, հանդամաս)` Աղնջաձորի: Մեր առաջարկությունն արժանացել է համապատասխան պետական մասնագիտական հանձնաժողովի դրական եզրակացության և առաջիկայում կներկայացվի ՀՀ կառավարության հաստատմանը»:
Եվ, քանի որ համաձայն որոշ ասեկոսեների Սելիմը ոչ թե տեղանուն է, այլ անձնանուն, դեռ ավելին, կապված է Սելիմ Ահեղի անվան հետ, պատմաբան Գեղամ Բադալյանը ASEKOSE.am-ի թղթակցի հետ զրույցում պատասխանեց, որ այս մասին հիշատակում է միայն Ստեփանոս Օրբելյանը` նշելով, որ Սյունյաց իշխանները մտան Սյունիք, ինչ վերաբերում է Սելիմ Ահեղին, ապա այդ մասին որևէ տեղեկություն չկա:
Անի Կարապետյան
