ՀԱԿ պատգամավորի Նիկոլ Փաշինյանը Կառավարությանը հարց տալու փոխարեն գերադասեց կարդալ իրեն «անընդհատ զանգող և նամակներ գրող» մի անձնավորության կենսագրությունը՝ նրան աշխատանքի ընդունելու համար.
«Քաղաքացին պահանջում է, որ ձեր կառավարության առջև բարձրացնեմ իրեն աշխատանքի տեղավորելու հարցը: Հիմա կներկայացնեմ նրա կենսագրություն-բնութագիրը և միասին կորոշեն՝ արդյոք արժանի չէ՞, որ ստանա բարձր պաշտոն: Նա ծնվել է 1956 թվականին, ստացել է փայլուն կրթություն, 1995 թ. ավարտել է «Պրոգրես» համալսարանի տնտեսագիտական ֆակուլտետը: Հետագայում հարուստ և բուռն կյանք է ունեցել: 3 անգամ դատապարտվել է տարբեր հանցագործությունների համար: Մի քնաիսը ձեզ կհետաքրքեն. հանրային սեփականության հափշտակություն՝ գողության միջոցով, ավտոմեքենայի գողություն, դատապարտվել է նաև ուրիշին ծանր մարմնական վնասվածքներ հասցնելու համար, դանակահարել է ինչ-որ մեկին, օրը ցերեկով ծեծի ենթարկեց կնոջ, երեխայի, վերջերս մարդ է սպանել: Քանի որ աղվեսի պես խորամանկ է, այնպիսի դիրքից է կրակել, որ տեսախցիկները չեն ֆիքսել, բայց, ինչպե ասում են՝ «փորձված աղվեսը զույգ ոտքով է թակարդն ընկնում: Տեսախցիկը ֆիքսել է նրա ձայնը: Այդ քաղաքացու անունը Սուրիկ է, 7 միլիոն դոլար փող ունի: Պարոն վարչապետ, գուցե մի լավ գործ տայի՞ք.նախարար, փոխնախարար, կամ, մարզպետի պաշտոն չէ՞ր գտնվի այս քաղաքացու համար»,-հարցրեց պատգամավորը:
ՀՀ վարչապետ Հովիկ Աբրահամյանը խնդրեց հստակեցնել հարցը:
«Գրեթե նույնատիպ, 99 տոկոսով համընկնող մարդու նշանակել եք Սյունիքի մարզպետ, մտածեցի, որ նման կենսագրություն ունեցող բոլոր մարդիկ կարող են հավակնել կառավարությունում պաշտոններ ստանալուն»,-արձագանքեց Նիկոլ Փաշինյանը:
Նրա խոսքով՝ անգամ Սյունիքի մարզպետարանի կայքում մարզպետի կենսագրության մեջ նշված է, որ ներկայացրել է «Պետական կառավարման հիմնահարցերը Սյունիքում հնագույն ժամանակներից մինչև մեր օրերը» թեմայով գիտական աշխատանք և ստացել պատմափիլիսոփայական գիտությունների դոկտորի աստիճան:
Անի Կարապետյան
