Սահմանամերձ համայնքների համար եթե մի բան ենք անում, եկեք շնորհքով անենք: Հիմա այս արտոնությունը ու՞մ ենք տալիս ու ի՞նչ ժամկետով,-այսօր՝ ԱԺ-ում խոսքն ուղղելով ԱԺ Տնտեսական հարցերի հանձնաժողովի նախագահ Վարդան Այվազանին՝ հարցրեց ՀԱԿ պատգամավոր Հրանտ Բագրատյանը:
«Ինչպե՞ս կարող ենք արտոնություն տալ՝ չիմանալով, թե ում և ինչքան ժամանակով: Եվ, հետո, պետության բյուջեն հաստատում է ԱԺ-ն և նա էլ պետք է որոշի ցանկացած օրենք, որը կապված է բյուջեի ավելացման, իջեցման հետ: Եվ, հետո, դուք տեսե՞լ եք, որ գնան հարկային արտոնություն տան այն մասով, որը նրանց համայնքների եկամուտն է համարվում: Ո՞վ ա տեսել ուրիշի հարս ու փեսով լավություն անեն»:
-Ո՞ր եկամուտների մասին է խոսքը,-հարցրեց Վ.Այվազյանը:
«Այստեղ տուրքեր կան, արտոնագրային վճարներ: Բացի դա՝ ինչը վերաբերում է եկամտահարկին՝ տեղական է, այլ հարց է, որ դա այսօր բերում ենք պետական բյուջե: Եթե նորմալ օրենք ունենայինք, կիմանայինք, որ եկամտահարկն ու շահութահարկի մեծ մասը պետք է մնան համայնքներին: Այդպես է ամբողջ աշխարհում՝ բացի ՀՀ-ից: Պետական բյուջե գալիս են անուղղակի հարկերը»,-պատասխանեց պատգամավորը:
Վ. Այվազյանը պատասխանեց, որ տալիս են սահմանամերձ տարածքներին, որի ցանկը կհաստատի Կառավարությունը: Երբ սկսում եմ հիշողությունս պրպտել, որոշակի առկայծումներ են տեղի ունենում: Ձեր վաչապետության օրոք բերեցիք մի օրենք, որով սահմանեցիք ամբողջ տուրքերը»,-նկատեց Տնտեսական հարցերի հանձնաժողովի նախագահը:
Բագրատյանը էլ դիտողություն արեց, նշելով, որ «Ձեր ժամանակ այսպես է եղել»-ը պատասխան չէ:
«Մեր ժամանակ տենց ա եղել, լավ ա եղել. հաղթել ենք պատերազմում: Եվ բոլորն արվել է մինչև Սահմանադրության ընդունումը ու ճիշտ ա արվել: 1994 թ.-ին 7 տոկոս աճ ենք ստացել, դե ստացեք»,-եզրափակեց պատգամավորը:
