Ազգային ժողովում քննարկման է դրվել Մարդու իրավունքների պաշտպանի 2013 թվականի հաշվետվությունը: ՀԱԿ պատգամավոր Արամ Մանուկյանի՝ հարակից զեկուցող ԱԺ Մարդու իրավունքների հանձնաժողովի նախագահ Էլինար Վարդանյանին ուղղված հարցը վերաբերում էր Շանթ Հարությունյանի և նրա ընկերների գործին.
«ՀԱԿ-ը հայտարարություն է տարածել Շանթին և 11 հոգու քաղբանտարկյալ ճանաչելու մասին, որը ամբողջապես համապատասխանում է ԵԽԽՎ հստակեցված չափանիշներին: Ձեր հանձնաժողովը քննարկե՞լ է այս հարցը»:
Էլինար Վարդանյանը պատասխանեց, որ դեռևս ոչ, քանի որ դատավճիռը վերջերս է հրապարակվել, իսկ այսօր առաջին աշխատանքային օրն է:
«Որպես քաղաքական գործիչ համաձայն եմ Ձեզ հետ, բայց որպես իրավաբան վերապահումով կարող եմ մոտենալ: Դա բարդ գործընթաց է ենթադրում: Ես իմ մտահոգությունը հայտնել եմ արդեն. խիստ մտահոգիչ է Շահեն Հարությունյանի հարցը: Դա մարդկային, բարոյական տեսանկունից անընդունելի է»,-ասաց Էլինար Վարդանյանը:
ՀԱԿ պատգամավոր Նիկոլ Փաշինյանն էլ կարևորեց հանձնաժողովում Հայաստանում եղած քաղբանտարկյալների վերաբերյալ լսումներ կազմակերպելը, որպեսզի հիմնավորեն տեսակետները, թե ինչո՞ւ են նրանց համարում քաղբանտարկյալ, ինչու` ոչ:
Էլինար Վարդանյանը համաձայնեց պատգամավորի հետ:
