«Մի տարի առաջ այս դահլիճում Սուրեն Պապիկյանը հայտնեց, որ պատրաստվում է լյուստրացիայի ենթարկել, հրապարակել կոնկրետ պաշտոնյաների անուններ, որոնց զավակները զարտուղի ճանապարհով ազատվել են ծառայությունից, բայց, ցավոք, մինչև հիմա դա չտեսանք»,- այսօր Աժ Պաշտպանության և անվտանգության հարցերի մշտական հանձնաժողովի ժամանակ ասաց ընդդիմադիր պատգամավոր Գեղամ Մանուկյանը։
Հիշեցնենք՝ հանձնաժողովում քննարկվում է «Զինվորական ծառայության և զինծառայողի կարգավիճակի մասին» օրենքում փոփոխություններ կատարելու մասին նախագիծը։
«Կառավարության նիստի ժամանակ հետաքրքիր երկխոսություն եղավ, Արարատ Միրզոյանը Սուրեն Պապիկյանին հարցրեց՝ սա կեղծ գիտնականներից ազատվելո՞ւ համար է։ Այդ կեղծ գիտնականներից մեկը Արարատ Միրզոյանի հետ 2018 թվականից բոլոր պաշտոններում եղել է՝ Կոստանյանը Վահանը։ Երեք տարի Համալսարանի Արևելագիտության ֆակուլտետի ասպիրանտուրան սովորեց, չծառայեց, որևէ գիտական հոդված չգրեց, որևէ քննություն չհանձնեց, վերջին պահին դուրս եկավ ասպիրանտուրայից, բանակ չգնաց, ՊՆ-ն ձևակերպեց՝ առողջական պատճառներով»,- ասաց Մանուկյանը։

Դիտեք նաև՝ Վահան Կոստանյանի հարցազրույցը՝ Asekose․am-ի արխիվից՝ 2013 թվականին