ԱԺ-ն այսօր շարունակեց քննարկել «Շահութահարկի մասին» օրենքում փոփոխություններ կատարելու մասին օրինագիծը երրորդ ընթերցմամբ ու ամբողջությամբ ընդունելու մասին նախագիծը:
Օրինագծով նախատեսվում է, որ տարեկան 50 մլրդ դրամ շրջանառություն ունեցող տնտեսվարողները կարող են իրենց ապրանքը արտահանել 2 տոկոս շահութահարկով, իսկ 40 մլրդ դրամ շրջանառություն ունեցողները՝ 5 տոկոս շահութահարկով:
ՕԵԿ խմբակցության ղեկավար Հեղինե Բիշարյանը, խմբակցության անունից խոսելով, նախ կոչ արեց պատգամավորներին՝ կամ լսել իրեն, կամ լքել դահլիճը: Ապա նա մեջբերեց Խրիմյան հայրիկիի խոսքերը՝ միմյանց չխաբելու համար.
«Հարկավոր է ունենալ երկու բժիշկ՝ մեկը մարդուն բուժելու, մյուսը՝ երկիր կառուցելու համար: Մենք այսօր պետք է լծվենք երկիրը կառուցելու գործին: Սա այստեղ նստածներից շատերի անձնական բիզնեսի հետ կապված օրինագիծ է: Ես հիմա ձեր շահերի պաշտպանն եմ: Ես ինքս բիզնես չունեմ»,-ասաց նա՝ հայտարարելով, որ ԱԺ-ն հիմա խախտում է կանոնակարգը. «Առաջին ընթերցմամբ ներկայացված նախագիծը երրորդի ժամանակ ամբողջովին փոփոխվել է: Ըստ այդմ՝ եկեք ազնիվ լինենք միմյանց հետ՝ սա ոչ թե երրորդ, այլ առաջին ընթերցման նախագիծ է: Ինչո՞ւ ենք ստեղծում այս նախագիծը, որը որեւէ դրական ազդեցություն կամ ընդհանրապես ազդեցություն չի ունենալու ՀՀ ներսում: Ինչո՞ւ ենք անհավասար դաշտ, պայմաններ ստեղծում մեր հայրենակիցների համար»:
Վերջում Հեղինե Բիշարյանը հորդորեց բոլորին՝ չմասնակցել այս օրինագծի քվեարկությանը:
