Լրագրող Սյուզի Բադոյանի ֆեյսբուքյան գրառումը․ «Երևանի թիվ 143  մանկապարտեզի  տնօրենին ձերբակալել են. սննդի գողության մեջ կասկածվող տնօրենը բերման էր ենթարկվել հենց իր աշխատասենյակից այսօր առավոտյան»:

Նշենք, որ օրերս Երևանի թիվ 143 մանկապարտեզի սաների ծնողները բողոքի ակցիա էին կազմակերպել։ Նրանք բողոքում էին, որ տնօրենի նախկին պաշտոնակատար Ռուզաննա Դանիելյանը, որը երեխաներին հատկացված սննդի յուրացումների, կաշառք ստանալու, աշխատավարձերի յուրացման դրվագներով է անցնում, Շենգավիթ վարչական շրջանի ղեկավար, ՔՊ–ական Տիգրան Գաբրիելյանի՝ փետրվարի 19-ի կարգադրությամբ վերանշանակվել է նախկին աշխատանքին: 

Տնօրեն Ռուզաննա Դանիելյանը ընդունել էր ծնողներին, որոնցից մեկը նշել էր. «Դուք ձեր դեմ հարուցված քրեական գործի մասին ի՞նչ կասեք, մեզ բոլորիս մտահոգում է դա։ Նորմա՞լ է, որ մեր երեխաները լարվածության մեջ մնան»։

Տնօրենը հրաժարվել էր  խոսել լրագրողների ներկայությամբ, ասել էր, որ ուզում է հանդիպել միայն ծնողների հետ և դուրս էր եկել սենյակից։

Հիշեցնենք, որ ներկայումս Հակակոռուպցիոն կոմիտեում քննվում է ՀՀ քրեական օրենսգրքի 435 և 436-րդ հոդվածների 1-ին մասերով, ինչպես նաև 256 -րդ հոդվածի 2-րդ մասի 2-րդ կետով հարուցված քրեական վարույթը: Խոսքը կաշառք ստանալու, կաշառք տալու և իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով՝ վստահված գույքը հափշտակելու հանցակազմերի մասին է։

Այս գործով Ռ. Դանիելյանի դեմ հաղորդում են ներկայացրել մեկ տասնյակից աշխատակիցներ:

Թե ինչ կարգավիճակ ունի այս գործով Ռ. Դանիելյանը, Հակակոռուպցիոն կամիտեն դեռևս չի հայտնել։

Ավելի վաղ էլ տեղեկություն էր տարածվել, որ  2024 թվականի հունիս-հուլիս ամիսներին Շենգավիթ վարչական շրջանի աշխատակազմի կողմից իրականացված ուսումնասիրությունների արդյունքում մանկապարտեզում աղաղակող խախտումներ էին բացահայտվել։