Տարվա ամենասպասված «Օսկար 2014» մրցանակաբաշխությունն արդեն պատմություն է: Մարտի 3-ին և դրան հաջորդող օրերին ողջ աշխարհը կլանված հետևում էր հեղինակավոր մրցանակաբաշխությանը, ապա և դրա արձագանքներին:  Այս տարի, սակայն, առանց չափազանցության,  հոլիվուդյան աստղերի հագուկապից, մրցանակակիրների արդարացի ու անարդար ընտրությունից, դահլիճում գրանցված «միջադեպերից» ու Դի Կապրիոյի հերթական ձախողումից  էլ ավելի բուռն քննարկվեց հոլիվուդյան աստղերի հյուասիրությունն ուղիղ եթերում: Նույնիսկ ամենահեղինակավոր լրատվամիջոցներն իրենց հրապարակումներում անդրադարձան աստղային հյուրասիրությանը:

Մեզ՝ հայաստանցի և աշխարհասփյուռ հայերիս համար, վերաբերմունքն այս ամենի նկատմամբ սովորական հետաքրքրասիրությունից ավելին էր, քանի որ համաշխարհային մեծության աստղերն ուղիղ եթերում ճաշակեցին  հայ գործարարին պատկանող Big Mama's & Papa's պիցերիաների ցանցի պիցցաները,  իսկ  մրցանակաբաշխության վարող հայտնի հաղորդավարուհի Էլեն  Դեջեներեսի ուղեկցությամբ աստղերին պիցցա հյուրասիրող երիտասարդը   Big Mama's & Papa's պիցերիաների ցանցի մասնաճյուղերից մեկի սեփականատեր Էդգար Մարտիրոսյանն էր:

Արձագանքն աննախադեպ էր..հաջորդ իսկ օրը Էդգարը հյուրընկավեց Էլեն  Դեջեներեսի համանուն շոուին: Ապա և դարձավ  CNN հեռուստաալիքի մեկնաբան Փիրս Մորգանի հյուրը, ով Էդգարին բնութագրեց որպես «աշխարհի ամենահայտնի պիցցա առաքող»:

Երբ Էդգարը, պիցցաները ձեռքին, սպասում  էր, երբեք  չէր պատկերացրել, որ դեմ առ դեմ կհանդիպի հոլիվուդյան աստղերին...

Էդգար Մարտիրոսյանը  ASEKOSE.am-ի թղթակցի հետ բացառիկ հարցազրույցում հետաքրքիր մանրամասներ է ներկայացրել.

 -Էդգար, Ձեր մուտքը դահլիճ և հյուրասիրությունը գրեթե բոլոր շրջանակներում մինչ օրս ամենաբուռն քննարկվող թեմաներից է: Ինչպե՞ս հայտնվեցիք Օսկարի դահլիճում: Խնդրում եմ պատմեք նախապատմությունը:

-Ինձ մրցանակաբաշխությունից երկու օր առաջ զանգահարեցին և ասացին, որ ուզում են  Օսկարի պրոդյուսերների, խմբագիրների և այլ աշխատողների համար պիցցա պատվիրել: Ես համաձայնվեցի: Ես այդ մասնաճյուղի սեփականատերն եմ և գրեթե ամեն օր այնտեղ եմ լինում: Ասացին՝  մեկ հատ պիցցա վերցնեմ և գնամ: Գնացի Dolby Theatre,  որտեղ Օսկարի մրցանակաբաշխությունն է տեղի ունենում: Ինձ ուղեկցեցին մի սենյակ, որտեղ շատ մարդիկ կային՝ Օսկարի պրոդյուսերներն էին, Էլենի պրոդյուսերը և այլն: Բացի ինձնից ուրիշ պիցցերիաներից էլ ներկայացուցիչներ կային: Զրուցեցին  ինձ հետ և երևի հավանեցին, որովհետև շատ ընկերական էի: Ասացին, որ մեկ ժամից ինձ պատասխան կտան:  Մի ժամ հետո զանգահարեցին, ամբողջական ինֆորմացիա վերցրեցին իմ մասին: Հաջորդ օրը կրկին կապ հաստատեցին ինձ հետ: Հարցնում  էին, թե որտեղի՞ց եմ, ինչպե՞ս եմ սկսել բիզնեսը և այլն: Պատմել եմ, որ եկել եմ այստեղ Մոսկվայից: Սկսել եմ այս գործը թուղթ բաժանելով: Հետո սկսել եմ պիցցա վաճառել, ապա պատրաստել և այդ ամենն արել եմ իմ ուժերով՝ եղբորս հետ միասին: Միասին ձեռք ենք բերել պիցցերիան և արդեն 8 տարի է՝ այս պիցցերիայի սեփականատերն եմ:  Ինձ  ասացին, որ ժամը 5-9-ը կզանգահարեն, և պետք է շատ կարճ ժամանակում պիցցա պատրաստեմ: Զանգահարեց Էլենի օգնականը, ում անունը ևս Էլեն է: Ասաց, որ գալիս են իմ հետևից: Այնտեղ պիցցաներով սպասում էի և մտածում էի, որ դրանք նախատեսված են պրոդյուսերների համար: Այդ պահին Էլենը դուրս եկավ: Ասաց՝ ինձ ճանաչո՞ւմ ես, ես Էլենն եմ: Ասացի՝ իհարկե: Ծանոթացանք, ձեռք սեղմեցինք, ասաց՝ երբ ասեմ հետևիցս արի, կգաս:  Էլենին հետևեցի և.. արդեն բեմում էի:

-Ի՞նչ զգացիք, երբ գիտակցեցիք, որ Օսկարի դահլիճում եք և պիցցա եք հյուրասիրելու աստղերին:

-Ճիշտն ասած՝ մի քիչ շոկի մեջ էի: Բայց չեմ խառնվել: Երևի տեսանյութերում էլ տեսել եք, որ շատ չեմ խառնվել: Էլենի հետ աստղերին պիցցա հյուրասիրեցինք:

-Ովքե՞ր օգտվեցին. լրատվամիջոցներն անուններ էին նշում. Բրեդ Փիթ, Ջարետ Լետո,  Ջուլիա Ռոբերթս,  Ջենիֆեր Լոուրենս, Քեվին Սփեյսի…

-Ջուլիա Ռոբերթսը,  Բրեդ Փիթը, Դի Կապրիոն չցանկացավ, սոված չէր (ժպտում է): Ու արդեն չեմ հիշում:

-Բրեդ Փիթն իսկապե՞ս օգնել է:

-Բրեդ Փիթը մեր հետևից գալիս էր և օգնում էր ափսեները բաժանել:

-Որևէ հետաքրքիր խոսակցություն աստղերի հետ եղե՞լ է: Ի՞նչն է տպավորվել:

-Երբ Էլենը գումար էր հավաքում, դերասաններից մեկն ասաց՝ կանխիկ գումար չկա, կրեդիտ  քարտ է, ասացի՝  ես կրեդիտ քարտ էլ կվերցնեմ: Դա էր հետաքրքիր: Աղմուկը շատ էր, լավ  չէի հասկանում, թե  ինչ է կատարվում և ուշադիր չէի լսում:

- Իսկ ինչպե՞ս էին  արձագանքում:

-Բոլորի համար անակնկալ էր, շատ նորմալ վերաբերվեցին: Տեսանյութը 2  անգամ նայել եմ, բոլորն էլ շատ լավ էին տրամադրված:

-Կա՞ր ինչ-որ մեկը, ում շատ էիք ցանկանում տեսնել և տեսաք:

- Ջուլիա Ռոբերթսն էր (ժպտում է):

-Էդգար, լրատվամիջոցների արձագանքն իսկապես աննախադեպ էր: Հյուրընկալվել էիք CNN-ի տաղավարում: Ո՞ր երկրներից են հետաքրքրվել:

- Հենց հաջորդ օրը առավոտյան Էլենի՝ TheEllenShow-ին եմ  հյուրընկալվել, ապա CNN-ից էին հրավիրել: Անկեղծ ասած՝ շատ-շատ տեղերից են զանգահարում՝ ամբողջ աշխարհից: Ավստրալիայից ռադիոյով ուղիղ եթերով եմ զրուցել ՝ իրենց առավոտյան շոուի ժամանակ: Գերմանիայից են շատ զանգահարում, Հնդկաստանից, Արգենտինայից, Բրազիլիայից, Մոսկվայից: Վաղը ևս հրավիրված եմ:

-Ե՞րբ եք տեղափոխվել ԱՄՆ:

-Ես Հայաստանում եմ ծնվել, Մոսկվայում՝  մեծացել: 2004-ին տեղափոխվել ենք ԱՄՆ: Դեռ նոր էինք տեղափոխվել, ես շինարարությամբ էի զբաղվում: 20 տարեկան էի, Մոսկվայում ուսումս կիսատ էի թողել: Այս ընթացքում, սակայն, կրթություն եմ ստացել:  Պիցցերիան  նոր էր բացվել, ես էլ աշխատանք էի փնտրում, նախ աշխատեցի որպես թուղթ բաժանող: Հետո պիցցա էի բաժանում: Միշտ ուտելիք պատրաստելու մեծ սեր եմ ունեցել: Սկսեցի պիցցա պատրաստել, ապա դարձա  մենեջեր, հետո ես ու եղբայրս դարձանք պիցցերիայի սեփականատեր:

Հեղինակ՝ Հասմիկ Գյոզալյան

72157641945946904