Ավելի վաղ տեղեկացրել ենք, որ ԵԱՀԿ Մինսկի խմբի ամերիկացի համանախագահ Ջեյմս Ուորլիքն այսօր պատասխանել է մի քանի լրատվամիջոցների ներկայացուցիչների հարցերին:
Համանախագահը նշեց, որ ցանկացել է հանդիպել լրատվամիջոցների ներկայացուցիչներին՝ գործընթացի թափանցիկությունն ապահովելու համար և պատրաստակամություն հայտնեց պատասխանել բոլոր հարցրեին:
«Ես գտնում եմ, որ շատ կարևոր է, որ Հայաստանի բնկաչությունը տեղյակ լինի մեր քննարկումների մասին: Ամեն անգամ, երբ ես Երևանում կամ Բավքում եմ, մշտապես փորձում եմ հանդիպել լրագրողների հետ», -նշեց Ուորլիքը:
Դիտարկմանը, թե տպավորություն կա, որ մեր նախագահի և երկրի վրա ճնշում է գործադրվում, Ուորլիքը պատասխանեց.
«Ես կարող եմ ասել, որ խնդիրը ճնշման մեջ չէ: Մենք փորձում ենք ուղի գտնել, որը կբերի խնդրի վերջնական լուծման»:
Անդրադառնալով հակամարտության կարգավորման ներկա փուլին՝ Ջեյմս Ուորլիքը նշեց, որ մարդկանց զայրույթը միանգամայն հասկանալի է, քանի որ բանակցություններն արդեն 20 տարի է, տեղի են ունենում:
«Այն պատերազմը, որ տեղի ունեցավ, երկու երկրների համար շատ դաժան էր, և մենք երբեք չենք ցանկանա, որ դա կրկնվի: Նման կարևոր խնդրի շուրջ բանակցությունները երբեք հեշտ չեն, բայց ինչպես ես նշել եմ, հնարավորության պատուհան կա: Անցած նոյեմբերին երկու նախագահները շատ լավ հանդիպում ունեցան Վիեննայում: Նրանք համաձայնեցին, որ խաղաղության հասնելու հնարավորություն կա: Ես չեմ կարող խոսել այն հանդիպման մասին, որը տեղի է ունեցել Վլադիմիր Պուտինի հետ Սոչիում, բայց կարող եմ ասել, որ պետքարտուղար Քերրիի հետ հանդիպումը արդյունավետ էր: Շատ ազնիվ հանդիպում էր, որտեղ հիմքեր դրվեցին, որոնց վրա կարելի է շարունակել հետագա գործընթացը»,- նշեց Ուորլիքը:
ԵԱՀԿ ՄԽ ամրիկացի համանախագահը համոզված է, որ ժամանակն է՝ բանակցությունները տարվեն մեկ այլ մակարդակի վրա: Նրա խոսքով՝ արդեն նախագահների կամ արտգործանարարների հանդիպումները բավարար չեն:
«Պետք է լինի ավելի պաշտոնական բանակցային գործընթաց: Եվ դա պետք է կողմերը որոշեն, թե ինչպիսի գործընթաց պետք է լինի: Իսկ մենք այստեղ ենք՝ աջակցելու համար: Իմ հարցը՝ Հայաստանին և Ադրբեջանին՝ ինչու՞ չի կարող լինել գործընթաց: Մենք չենք ցանկանում վերջնական արդյունք նախանշենք, ցանկանում ենք՝ տեղի ունենա գործըթնաց, որը կտանի դեպի խաղաղություն»:
Ուորլիքը նշեց, որ ԵԱՀԿ կողմից եղել են առաջարկներ՝ փոխադարձ վստահություն կառուցելու համար: Բոլոր քայլերը, որոնք կարող են օգնել լարվածության կրճատմանը, պետք է ձեռնարկվեն:
«Շատ կարևոր է իմանալ, թե այս գործողություններն ինչպես են սկսվում և ով է պատասխանատուն: Փաստն այն է, որ մի կողմը մեղադրում է մյուս կողմին: Կարծում եմ՝ ուղերձը կողմերին պիտի լինի այն, որ հարգեն հրադադարի ռեժիմը և սկսեն մի գործընթաց, որը կտանի դեպի խաղաղություն: Սահմանի վրա այս գործողությունները չեն տանում այնպիսի գործընթացի, որը կարող է ապահովել այն խաղաղությունը, որը մենք ցանկանում ենք»,-ասաց Ուորլիքը՝ վստահեցնելով.
«Մինսկի խումբը և համանախագահները կհամաձայնենք բոլոր այն քայլերին, որոքն կտանեն դեպի խաղաղություն և մենք խրախուսում ենք այդ քայլերը»:
Կարդացեք նաև՝
Քայլերը, որ կցանկանայինք տեսնել դեպի խաղաղություն տանող ճանապարհին, դեռ չենք տեսնում. Ուորլիք
Հեղինակ՝ Հասմիկ Գյոզալյան
