Լրագրող Նաիրի Հոխիկյանի ֆեյսբուքյան գրառումը․ «Իրանի դեմ ԱՄՆ-ի և Իսրայելի հրթիռային հարվածների հետևանքով վնասվել են նավթի պահեստարաններ, որտեղից մթնոլորտ են արտանետվում թունավոր միացություններ՝ առաջացնելով թթվային անձրևներ։ Այդ մասին հայտարարել է Իրանի Կարմիր մահիկը՝ բնակիչներին կոչ անելով զգուշանալ թունավորումներից։
Սա վտանգավոր է ոչ միայն Իրանի, այլև տարածաշրջանի մյուս երկրների, այդ թվում՝ Հայաստանի համար։
Մետեորոլոգներն ասում են, հատկապես գարնանը տարածաշրջանում ցիկլոնային ակտիվության ժամանակ իրանական բարձրավանդակից ձևավորվում է հարավային ցիկլոն, որից օդային զանգվածը շարժվում է դեպի Նախիջևան, Սյունիք ու Արարատյան դաշտ։
Մեզ մոտ երբեմն հանդիպող «կեղտոտ անձրևներն» էլ են Իրանի տարածքով հասնում արաբական անապատներից։ Հետևաբար մեծ է վտանգը, որ Իրանում առաջացող թթվային թունավոր անձրևաբեր ամպերը կարող են հասնել նաև Հայաստան։
Այդ խնդրի լուծման ամենամեծ գործը, թերևս, Շրջակա միջավայրի նախարարության, ինչպես նաև ՆԳ նախարարության փրկարար ծառայության շրջանակում է։ Այդ երկու գերատեսչությունները ուղղակի պարտավոր են հետևել Իրանում ձևավորվող ամպերի տեղաշարժին և աղետների դեմ պայքարի ծրագրով կանխարգելել այդ ամպերի մուտքը Հայաստան։
Կարող եք հարցնել, թե ինչպես։
Կան բազմաթիվ տեխնոլոգիաներ, երբ ցրում են ամպերը կամ հեռացնում։ Թուրքիան հաճախ կիրառում է դրանք, երբ ամպերը քշում է իր կողմից դեպի Հայաստան։ Այս դեպքում մենք պետք է իրանական ամպերը քշենք դեպի Թուրքիա կամ Ադրբեջան։
Հասկանում եմ, որ պարզունակ ու հիմար մարդկանց համար սա հեգնանքի առիթ է, ոմանք կարող են սա զավեշտի վերածել, ասել, թե ամպերի դեմ կռիվ է, բայց երկրի ու ժողովրդի համար պատասխանատվություն ունեցող յուրաքանչյուր անհատ և առավել ևս կառավարություն ուղղակի պարտավոր է գործնական քայլեր անել։
Իսկ եթե ամեն դեպքում իրանական թթվային անձրևաբեր թունավոր ամպերը հասնեն Հայաստան, ապա գոնե մարդկանց պետք է տեղեկացնել, որ այս օրերին առավելագույն չափով զգույշ լինեն, դրսում քիչ մնան, հատուկ դիմակներ կրեն, պատուհանները փակ պահեն և այլն»։

***

Թարմացում․ «Հիդրոօդերևութաբանության և մոնիթորինգի կենտրոն» ՊՈԱԿ-ը հայտնում է․ «Էլեկտրոնային լրատվամիջոցներում տարածվող որոշ հրապարակումների կապակցությամբ՝ կապված «թթվային թունավոր անձրևների հետ», հայտնում ենք, որ ՇՄՆ «Հիդրոօդերևութաբանության և մոնիթորինգի կենտրոն» ՊՈԱԿ-ն Ամբերդի դիտակայանում իրականացնում է մթնոլորտային տեղումների որակական մոնիթորինգ։
Մարտի 7-8-ը տեղացած մթնոլորտային տեղումների որակական կազմի ուսումնասիրության համաձայն՝ տեղումներում թթվայնության, անիոնային և կատիոնային կազմի փոփոխություն չեն դիտվել։
Միաժամանակ մարտի 9-11-ն ընկած ժամանակահատվածում Հայաստանը գտնվելու է հյուսիս-արևելյան օդային հոսանքների ազդեցության գոտում, իսկ մարտի 12–20-ը հանրապետությունում հիմնականում կգերակշռեն հարավ-արևմտյան հոսանքները, որոնք ձևավորվում են Միջերկրական ծովի ավազանում։ Մթնոլորտային գործընթացների վերլուծությունը ցույց է տալիս, որ առաջիկա օրերին Իրանի տարածքից դեպի ՀՀ օդային հոսանքների ներթափանցում չի կանխատեսվում։ Հարավային ցիկլոնների ներթափանցումը ՀՀ տարածք հիմնականում դիտվում է Իրաքի շրջաններից, այլ ոչ թե Իրանից, նման ցիկլոնների ներթափանցում մեր տարածաշրջան լինում է խիստ հազվադեպ։
Հավելենք նաև, որ առաջիկա 10 օրերին Իրանի տարածքում նկատվում է օդային հոսանքների արևմուտք-արևելք տեղաշարժ, այսինքն օդային զանգվածներն Իրանի տարածքից տեղաշարժվում են դեպի Թուրքմենստան։
ՇՄՆ «Հիդրոօդերևութաբանության և մոնիթորինգի կենտրոն» ՊՈԱԿ-ի կողմից իրականացվում է մթնոլորտային պայմանների մշտադիտարկում և առաջին իսկ փոփոխությունների դեպքում հասարակությունը տեղեկացված կլինի։
Բնակչությանը հորդորում ենք հետևել միայն ՊՈԱԿ-ի կողմից տրված պաշտոնական տեղեկատվությանը»։