Թարմացված․ ԱԺ ՔՊ-ական պատգամավոր Հրաչյա Հակոբյանը ֆեյսբուքյան իր էջում գրում է․ Օրերս lurer.com լրատվական կայքն անդրադարձել է իմ հանդերձանքին, մասնավորապես՝ կոշիկներին՝ ներկայացնելով, թե իբր հագել եմ Loro Piana բարձրակարգ բրենդի կոշիկներ։ Տեղեկությունն իհարկե չի համապատասխանում իրականությանը։ Կարծում եմ՝ լրատվամիջոցների տեղեկություններ փնտրելու և ստանալու իրավունքի իրացումը կարող էր ավելի արդյունավետ և հանրության համար օգտակար իրականացվել, մասնավորապես՝ կոշիկներիս ենթադրյալ բարձր գնի վերաբերյալ սուտ տեղեկատվություն տարածելու փոխարեն հանրությանն ավելի կարևոր ու իմաստալից տեղեկություններ է պետք հաղորդել։
Այնուամենայնիվ, եթե lurer.com-ի խմբագրակազմին հուզում է կոշիկներիս իրական արժեքը/բրենդը, ապա թյուրիմացությունից խուսափելու նպատակով, այս հրապարակմանը կկցեմ կոշիկներիս նկարը՝ իր բրենդի և արժեքի նշումով:
Ինչ վերաբերում է մաքսանենգության մասին «լուրերին», որը նույնպես տեղ է գտել հոդվածում, նշեմ նաև, որ զրպարտությունը հերքելու պահանջով ներկայացրածս բոլոր հայցերը դատարանը բավարարել է։ Եվ հույս ունեմ, որ ստիպված չեմ լինի նաև lurer.com-ին դատական կարգով պարտավորեցնելու հերքել իմ հասցեին արված զրպարտությունը:
Լիահույս եմ նաև, որ, եթե այս հրապարակման նպատակը ոչ թե պարզապես ինձ անվանարկելն է եղել, այլ բարեխիղճ լրագրությունը, լրատվական կայքը ողջախոհություն կունենա և նաև կհրապարակի իմ այս արձագանքը:
***
Լուրեր․com-ը գրում է․ Վարչապետի աներորդի Հրաչյա Հակոբյանը, որ տարիներ առաջ մի գարեջրի սեղանի հաշիվ հազիվ կարողանար փակել, երեկ ՔՊ-ական պատգամավոր Մարիամ Պողոսյանի հարսանիքին ներկայացել է Loro Piana բարձրակարգ բրենդի 820 եվրոյանոց կոշիկներով:
Չմոռանանք ` պատգամավորության առաջին տարիներին Հրաչյա Հակոբյանն արագորեն ճոխ առանձնատուն գնեց Ձորաղբյուրի ամառանոցներում, իսկ հետո, ըստ մամուլի հրապարակումների, հաջողեց թաթախվել մաքսանենգ ճանապարհով սիգարետի արտահանման շուկա, հիմա արդեն նա վայելում է բրենդային հագ ու կապ` «հալալ քրտինքով»:
Հիշեցնենք` պատգամավորական աշխատավարձը հավելավճարով հասնում է մինչեւ 400-650 հազարի, իսկ այդ գումարով հայրենի պատգամավորները հազիվ թե հասցնեն եվրոպական բարձրակարգ բրենդի միայն մեկ կոշիկ կամ մեկ տաբատ գնել, իսկ ուտել, ապրե՞լ:
Դիտեք նաև՝
Դիտեք նաև՝
