ԱԳՆ-ի շենքի դիմացից բերման ենթարկված 29 քաղաքացիները, որոնցից 25-ը՝ Կենտրոնի, 4-ը՝ Շենգավիթի ոստիկանական բաժիններում են, զանգվածային անկարգության մեղադրանքով են ձերբակալվել, հայտնեց փաստաբան Սերգեյ Հարությունյանը: Հոդվածը ենթադրում է 4-8 տարի ազատազրկում:

«Այսօր տեղի ունեցածը խտրական արդարադատության հերթական օրինակն էր»,- նշեց նա:

«Ունենք 7 վիրավոր անձ, որոնք ոստիկանների գործողությունների հետևանքով բավականին ծանր վիրավորում են ստացել։ Բոլորը ծանր ու միջին վիրավորում ունեն։ Ինչն է հետաքրքիր։ Մենք տեսանյութում տեսնում ենք, որ ինչ-որ առարկաներ, շշեր են նետվում ոստիկանների ուղղությամբ և անմիջապես սկսում են գործողություն անել։ Բայց գործողությունն արվում է ոչ թե այն մարդկանց նկատմամբ, որոնք շշեր էին նետում, այլ Սրբազանի մոտ կանգնած մարդկանց նկատմամբ։ Պարզ է չէ, որ սա սադրանք է, ակնհայտ սադրանք»,- ասաց Սերգեյ Հարությունյանը։

«Վարչախումբը ձերբակալել է «ՀայաՔվեի» խորհրդի անդամ, 44-օրյա պատերազմի մասնակից Դավիթ Արիստակեսյանին` զանգվածային անկարգություններ կազմակերպելու շինծու մեղադրանքով: Խստորեն դատապարտում ենք մեր պայքարի ընկերոջ ձերբակալությունը և օրինական բոլոր միջոցներով հասնելու ենք նրա շուտափույթ ազատ արձակմանը»,- այս մասին տեղեցնում է Խորհուրդը։

***

2024թ. մայիսի 31-ին ՀՀ ՆԳՆ ոստիկանությունից հաղորդում է ստացվել այն մասին, որ նույն օրը՝ ժամը 15:00-16:00-ն ընկած ժամանակահատվածում, «Տավուշը հանուն հայրենիքի» շարժման կազմակերպիչների և մասնակիցների կողմից իրականացվող անհնազանդության գործողությունների ժամանակ պահպանության ենթակա՝ Երևան քաղաքի Վազգեն Սարգսյան փողոց 3 Կառավարական տուն 2 հասցեում գտնվող ՀՀ արտաքին գործերի նախարարության շենք մուտք գործելու նպատակով, ոստիկանական պատնեշը հաղթահարելու համար, բռնություն են գործադրել ոստիկանների նկատմամբ։

Ակցիայի մասնակիցների շրջանակից նշված վայրում իրենց ծառայողական պարտականությունները կատարող ոստիկանների ուղղությամբ նետվել են քարեր, ջրով լցված տարաներ, ծխարձակող ճայթուկներ և այլ առարկաներ։

Զանգվածային անկարգությունների մասնակիցներից ոմանք այդ գործողությունների ժամանակ հնչեցրել են ՀՀ արտաքին գործերի նախարարության շենքը գրավելու կոչեր:
Ելնելով ստեղծված իրավիճակից՝ տեղում ծառայություն իրականացնող ոստիկանների կողմից ձեռնարկվել են անհրաժեշտ միջոցառումներ, որի շրջանակներում 28 անձ տեղափոխվել է Ոստիկանության բաժին:

Հաղորդման հիման վրա ՀՀ քննչական կոմիտեի հատկապես կարևոր գործերի քննության գլխավոր վարչությունում, ՀՀ քրեական օրենսգրքի 327-րդ հոդվածի 1-ին մասով, նախաձեռնվել է քրեական վարույթ:

Պարզվել է, որ Ոստիկանության 7 աշխատակից դիմել է բուժօգնության, բուժհաստատություններ են դիմել նաև մասնակիցներից։

Որոշումներ են կայացվել, հանցավոր արարքներ կատարելու մեջ անմիջականորեն ծագած հիմնավոր կասկածի հիմքով, նշված 28 անձանց ձերբակալելու վերաբերյալ։

Ձեռնարկվում են անհետաձգելի միջոցառումներ՝ առերևույթ անկարգությունների կազմակերպիչ և մասնակից անձանց ամբողջական շրջանակը, յուրաքանչյուրի ինքնությունը պարզելու, նրանց արարքներն անհատականացնելու, նշված անձանց վարույթն իրականացնող մարմնին ներկայացնելու ուղղությամբ: Այդ նպատակով ուսումնասիրվում են նաև առերևույթ զանգվածային անկարգությունների ընթացքի նկարագրությանը վերաբերող, համացանցում առկա տեսանյութերը։

Կատարվում է նախաքննություն:

Ոստիկանությանը տրվել են օպերատիվ-հետախուզական միջոցառումներ իրականացնելու հանձնարարություններ, հայտնում է ՀՀ քննչական կոմիտեն: