Թուրք լրագրողը վարչապետ Նիկոլ Փաշինյանին հարց ուղղեց. «Հայաստանի և Թուրքիայի միջև Ցեղասպանության հարցը ինչպիսի՞ ազդեցություն ունի հիմա: Ըստ ձեզ, դա արդեն նախկի՞ն հարց է: Հայաստանը նախկինում քաղաքականություն էր վարում, որ Ցեղասպանությունը տարբեր երկրների խորհրդարաների կողմից ընդունվի: Կարո՞ղ ենք ասել, որ այս քաղաքականությունն արդեն չի կիրառվում: Նույնկերպ ձեր Սահմանադրության ներածական մասում տեղ են գտել «Արևմտյան Հայաստան» և «Ցեղասպանություն» եզրույթները: Եթե Սահմանադրությունը փոխվի, դրանք տեղ չե՞ն գտնելու նոր Սահմանադրության մեջ»:

Փաշինյանը պատասխանեց. «Մեր պաշտոնական դիրքորոշումն այն է, որ Հայոց Ցեղասպանության միջազգային ճանաչումը մեր արտաքին քաղաքականության առաջնահերթությունների մեջ չի մտնում այսօր: Բայց այս համատեքստում կան հարցեր, որոնց պարզաբանումը շատ էական է և կարևոր: Այդ հարցերի շուրջ ես հիմնականում աշխատանքային ռեժիմով անընդհատ խոսում եմ և Հայաստանում և արտերկրում մեր հայրենակիցների հետ զրույցում: Խոսք է գնում Մեծ եղեռն ուրանալու կամ մոռանալու մասին: Ես ուզում եմ շատ հստակ լինի, որ Հայաստանում և հայության շրջանում դա անառարկելի ճշմարտություն է: Այսինքն, ուղղակի մեր իրականության մեջ հնարավոր չէ դա ժխտել կամ ուրանալ: Դա բոլորիս համար անուրանալի ճշմարտություն է»:

Նա նաև կարծիք հայտնեց, որ հեռավոր երկրների կողմից Ցեղասպանության ընդունումը իրականում լարումներ է ստեղծում մեր տարածաշրջանում, որոնք հարց է` ինչքանով են մեզ ձեռնտու:
Նա նաև փաստեց, որ ՀՀ Սահմանադրությունում «Արևմտյան Հայաստան» եզրույթ չկա, և իր ընկալմամբ` Արևմտյան Հայաստանն Արմավիրի մարզն է և Շիրակի կոնկրետ բնակավայրեր: «Մենք պետք է հասկանանք ուրիշների ընկալումները մեր մասին: Եթե մենք ասում ենք` սպասեք` մենք կհզորանանք և տեսեք, թե ինչ փոփոխություններ կբերենք տարածաշրջանում, դա կընկալեն սպառնալիք: Այսօր էլ Հայաստանում բոլորն ընկալում են, որ Թուրքիան սպառնալիք է Հայաստանի համար: Նույնն էլ մեր հայտարարությունները կարող են դիտվել սպառնալիք` Թուրքիայի համար»,- ասաց նա:

Թուրք լրագրողի հարցին` հայ-թուրքական հարաբերությունների մասին, վարչապետ Նիկոլ Փաշինյանը պատասխանեց. «Խոսակցությունը, որ սկսվել է Հայաստանի ու Թուրքիայի միջև, շատ կարևոր է: Կցանկանամ, որ Հայաստանի ու Թուրքիայի միջև հաստատվեն դիվանագիտական հարաբերություններ: ...Ցամաքային սահմանը կբացվի երրորդ երկրների քաղաքացիների և դիվանագիտական անձնագիր ունեցողների հյամար: Մենք սպասում ենք այդ պայմանավորվածության իրագործմանը: Քանի որ այս պայմանավորվածությունն իրագործված չէ, կարծիք է ստեղծվում, թե Հայաստանի ու Թուրքիայի միջև չկա խոսակցություն: Այնինչ Հայաստանի ու Թուրքիայի դիվանագիտական ներկայացուցիչները մշտական ուղիղ կապի մեջ են իրար հետ: Սա շատ կարևոր է, որովհետև նախկինում մենք երրորդ երկրների միջոցով ենք իմացել, թե ինչ են մտածում Անկարան կամ Երևանը»

«Մեզ համար անընդունելի է «Զանգեզուրի միջանցք» եզրույթը: Բայց մենք միշտ կողմ ենք տարածաշրջանում բոլոր կոմունիկացիաների բացմանը: Նոյեմբերի 9-ի եռակողմ հայտարարության 9-րդ կետում միջանցք արտահայտություն ընդհանրապես չկա: Համաձայնագրում էլ կա միայն Լաչինի միջանցք արտահայտություն` գրված, ստորագրված է: Ավելին, շատ է խոսվում, որ կա դրույթ, որ ՀՀ տարածքով ուղևորների և բեռների տեղափոխման անվտանգությունը պետք է ապահովեն 3-րդ երկրների ներկայացուցիչներ և ուժեր: Նման բան ընդհանրապես չկա: Ավելին, գրված է, որ ՀՀ-ն երաշխավորում է բեռների, տրանսպորտային միջոցների, ուղևորների անվտանգ երթևեկությունը: Ինչպես կարող է ՀՀ-ն երաշխավորել, եթե ինքը չի վերահսկելու:
Բայց նաև ուզում եմ եռակողմ հայտարարության հետ կապված հետևյալ դիտարկումն անել` եռակողմ հայտարարությանը չի կարելի վերաբերվել հատվածական: Օրինակ, նշվում է գերիների, պատանդների, այլ պահվող անձանց փոխանակման և վերադարձի մասին, բայց մինչև հիմա այդ խնդիրը լուծված չէ, ավելի սրվում է Բաքվում տեղի ունեցող բեմականացված դատավարությունների բերումով, որտեղ կիրառվում են արգելված միջոցներ, խոշտանգումներ, այլ արգելված միջոցներ: Եռակողմ հայտարարության մեջ գրված է «Լեռնային Ղարաբաղ», Արդբեջանը պնդում է, որ ԼՂ չկա: Խոսվում է փախստականների վերադարձի մասին` ԼՂ և հարակից շրջաններ, բայց հայտարարությունից հետո ընդհակառակը, փախստականների թիվը մեծացել է և տեղի է ունեցել բռնի տեղահանում: Դա լավ մոտեցում չէ` եռակողմի դրույթներին վերաբերվել հատվածական: Մի տեղում ասել` ուժ չունի, մյուսում վերագրել դրույթներ, որոնք գոյություն չունեն»,- թուրք լրագրողների հետ զրույցում ասաց վարչապետ Նիկոլ Փաշինյանը:

«Հենց այսօր ավտոտրասպորտային հաղորդակցություն հնարավոր է ապահովել Թուրքիայի հետ` Մարգարայով մինչև Տեղ, որից հետո Ադրբեջանի սահմանը հատելով կարելի է շարունակել մինչև Ադրբեջանի խորք: Այս ընկալումների համախումբն ենք անվանել «Խաղաղության խաչմերուկ»: Հատուկ ենք ընտրել «Խաղաղության խաչմերուկ» անունը, որ մեր հարևան ոչ մի երկրում ալերգիա չառաջացնի»,- թուրք լրագրողների հետ զրույցում ասաց վարչապետ Նիկոլ Փաշինյանը:

***

«Ադրբեջանը մեր երկրի 60-70%-ը համարում է «Արևմտյան Ադրբեջան» և մեզ հրավիրում է դա քննարկելու: Այդ հարցը մեզ համար ընդհանրապես ընդունելի ու քննարկելի չէ: Ադրբեջանը հաճախ հակասում է ինքն իրեն: «Զանգեզուրի միջանցք» ասվածն էլ անընդունելի է, որովհետև դա նույնպես տարածքային սպառնալիք է: Ադրբեջանից ամեն օր հնչում են ուժի կիրառման սպառնալիք, ամեն օր` Հայաստանի պետականության գոյության սպառնալիք, ամեն օր ագրեսիվ հռետորաբանություն, «Արևմտյան Ադրբեջանի» խոսույթ, և զուգահեռ` հրավիրում է քննարկելու, կներեք, սա առնվազն տարօրինակ է: Հոսող տարածաշրջանում հնարավոր չէ ոչ մի բան կառուցել»,- թուրք լրագրողների հետ հարցազրույցում ասաց Նիկոլ Փաշինյանը: