Հունվարի 20-ին «Նոյյան Տապան» լրատվական գործակալության մամուլի սրահում տեղի ունեցավ ասուլիս` «Գյումրիում տեղի ունեցած ոճրագործությունը. Պուտին - Էրդողան նոյեմբերյան հանդիպման արդյունքների արձագանքները, հետևանքները և զարգացումները 2015 թվականին» թեմայով: Ասուլիսի բանախոս Սարգիս Հացպանյանը Գյումրիում տեղի ունեցած ոճրագործությունը կապում է նոյեմբերին տեղի ունեցած Պուտին-Էրդողան հանդիպման հետ: Ըստ վերլուծաբանի Պուտին-Էրդողան հանդիպումից տուժողը հայությունն ու Հայաստանն է: «Ես այն մարդկանցից եմ, ովքեր կարծում են, որ 2015-ի առաջին իսկ օրերին տեղի ունեցածը հենց այդ հանդիպման արդյունք է, քանի որ Ռուսաստանը Հայաստանում ունի ոչ թե քաղաքական, տնտեսական կամ մշակութային ներկայություն, այլ` ռազմական: Անմեղսունակ պիտի լինել, մտածելու համար թե այդ տղան ինքնուրույն է մտածել և կատարել գործողությունը»-ասաց Հացպանյանը:
Բանախոսը տարօրինակ է համարում նաև համաշխարհային մամուլի լռությունն ու անտարբերությունը: Նրա խոսքով բացի հայկական մամուլից ոչ մի երկիր չի արձագանքում Գյումրիում տեղի ունեցած ոճրագործությանը, լուռ է նաև եվրոպական մամուլը: Եվ եթե նման բան տեղի ունենար այլ երկրում նույնիսկ մեզ հարևան երկրներում, մինչև հիմա ողջ հասարակությունը տեղեկացված կլիներ:
«Այս ամենը չլինելու պատճառը 2015-ին ընդառաջ մեր այսպես ասած շատ խեղճացած, ինքնուրույն ոչ ինքնիշխան իշխանությունների ժամանակահատվածում ապրող լինելուց է գալիս: 25 տարի է ապրում եմ Հայաստանում երբեք ինձ այսաստիճան բարոյալքված չեմ զգացել»-նշեց բանախոսը:
Ինչ վերաբերում է թուրքական մամուլին, ապա այստեղ միայն կարելի է գտնել հայերենից կատարված թարգմանություններ: Վերլուծաբանի կարծիքով Գյումրիում տեղի ունեցածը ձեռնտու էր ԱՄՆ-ին, Թուրքիային և Արևմտյան երկրներին և այս ոճրագործության հետևում կանգնած են այս երկրների ներկայացուցիչներ:
Անդրադառնալով Գյումրիում տեղի ունեցած խռովություններին բանախոսը նշեց, որ դրանց հետևանքը եղավ ՌԴ նախագահ Վլադիմիր Պուտինի ցավակցությունը: «Եթե չլինեին Գյումրիի դեպքերը Պուտինը ցավակցություն չէր հայտնի: Հայաստանը թանկ չէ ռուսական կողմի համար և վերջինս ցանկացած պահի Հայաստանին կհանձի առյուծի երախը, իսկ Արցախյան խնդիրը հակահայկական հանգուցալուծում կստանա, իսկ ռուսները երբեք հայամեդ կեցվածք չեն ընդունի»- եզրափակեց Հացպանյանը:
Հասմիկ Գրիգորյան
