Նախօրեին Լոռու մարզում տեղացած ձվի չափերի հասնող կարկուտը զգալի վնասներ է հասցրել գյուղատնտեսությանը: Գյուղացին կրկին կանգնել է լուրջ խնդիրների առաջ: Առանձին վայրերում բերքից բացի վնասվել են նաև տների տանիքներ:
ASEKOSE.am-ի թղթակիցը կապ է հաստատել համայնքերի ղեկավարների հետ՝ ճշտելու վնասի չափը:
Ագարակ գյուղում կարկուտի հասցրած վնասները բավական շատ են: Վնասվել է կարտոֆիլի, եգիպտացորենի, գարու բերքը, բանջարանաբոստանային կուլտուրաները: Համայնքի ղեկավար Ռուբեն Բարխուդարյանն արդեն հաշվարկել է վնասի չափը: Այն հետևյալ պատկերն ունի.
Կարտոֆիլ՝
40 հա- 70 տոկոս
20 հա-40 տոկոս
20 հա- 30 տոկոս
Աշնանացան ցորեն՝
75 հա-գրեթե 100 տոկոս
100 հա-40-45 տոկոս
Եգիպտացորեն՝
10 հա-30-40 տոկոս
Գարի՝
2 հա-40-50 տոկոս
Ինչ վերաբերում է բանջարանաբոստանային կուլտուրաներին, որոշ վայրերում բերքը վնասվել է, որոշ վայրերում՝ ոչ:
Ագարակում տանիքներ չեն վնասվել: Պարոն Բարխուդարյանի խոսքով՝ գյուղի մոտակայքում գործող հակակարկտային կայանները երևի մի փոքր փրկել են այդ առումով:
Վնասի հաշվարկը ներկայացվելու է մարզպետարան: Գյուղապետի խոսքով՝ երեկ գյուղնախարարն այցելել է Ագարակ՝ իրավիճակին անձամբ ծանոթանալու:
Իսկ ահա Լոռի Բերդ համայնքի ղեկավար Խաչատուր Բալայանն ASEKOSE.am-ի թղթակցի հետ զրույցում նշեց, որ այդ համայնքում վնասները համեմատաբար քիչ են:
«Իհարկե, վնասներ կան, սակայն դրանք չեն հաշվարկվել, քանի որ այնքան թեթև են, որ կարիք չկար անգամ հաշվարկելու: Մենք որևէ մեկի չենք դիմելու»:
Գյուղապետի խոսքով՝ Ագարակի մշակովի հողատարաքծները քիչ են և հիմնականում այն վայրում են, որտեղից սկսվել է կարկուտը, այդ պատճառով քիչ են վնասվել:
«Մշակովի հողատարածքներում կարկուտը փոքր չափերի է եղել՝ և գրեթե անձրևի նման: Իսկ տնամերձերում մի քանի մարգ, մի քանի սածիլ է վնասվել, այնպես որ դիմելու անհրաժեշտություն չկար»:
Հեղինակ՝ Հասմիկ Գյոզալյան
Լուսանկարը՝ lorinews.am-ի
