Աշխարհաքաղաքական իրավիճակով պայմանավորված` Բեյրութում գտնվող «Երևան» երիտասարդական նվագախումբը Հայաստան կվերադառնա նախատեսված ժամկետից շուտ
Երևանի քաղաքապետ Տիգրան Ավինյանը երեկ երեկոյան տեսաուղերձով հայտնել է, որ քաղաքապետարանը զբաղվում է այդ հարցով` ծնողներին հորդորելով չանհանգստանալ։
«Նվագախումբը հանդես էր գալիս Ալ-Բուստան միջազգային երաժշտական փառատոնի շրջանակներում: Մեր նվագախումբը շատ տպավորիչ ելույթներ է ունեցել միջազգային աստղերի հետ համատեղ: Բայց, հաշվի առնելով տարածաշրջանում լարված իրավիճակը, մենք որոշում ենք կայացրել մեր երեխաներին, մեր նվագախումբը վերադարձնել Երևան ժամկետից էականորեն ավելի շուտ: Եվ ինտենսիվ կապի մեջ ենք Լիբանանում մեր դեսպանի և լիաբանանյան ազգային ավիափոխադրողի հետ, որ ավիափոխադրումը կազմակերպենք ժամկետից էականորեն շուտ»։
Երևանի քաղաքապետարանից հայտնել են, որ նվագախումբը դեռևս Բեյրութում է։
***
Բեյրութը հզոր ավիահարվածի է ենթարկվել
RT–ի լիբանանյան բյուրոյի ղեկավար Սթիվ Սուինին հայտնել է, որ Իսրայելի ռազմական ինքնաթիռները այնքան ցածր են թռել, որ նրանց հռնդյունը լսելի է եղել ամբողջ քաղաքում։
ՌԻԱ Նովոստին, հղում անելով ականատեսներին, հաղորդում է, որ իսրայելական ինքնաթիռները հարձակվել են Բեյրութի արվարձանում գտնվող բնակելի շենքի վրա:
Ըստ «Ալ Մայադին» հեռուստաընկերության` Իսրայելի ռազմաօդային ուժերը նաև հարվածել են Բեյրութի «Ալ Մանար» հեռուստաալիքի և «Ալ Նուր» ռադիոկայանի գլխավոր գրասենյակներին:
