Ինչպես արդեն տեղեկացրել ենք՝ միջադեպ է տեղի ունեցել  Երևանի կենտրոնում. անվտանգության աշխատակիցներն արգելել են ազատամարտիկ, Տիգրան Մեծ բարեգործական կազմակերպության նախագահ Սրապիոն Գևորգյանին լուսանկարվել Կասկադում` եռագույն դրոշով` պատճառաբանելով, թե տարածքը մասնավոր է...

Սրա հետ կապված կա առաջարկ. մի խումբ քաղաքացիներ որոշել են Կասկադը «պատել» եռագույնով՝ ի նշան նրա, որ Կասկադում ոչ ոք չի կարող արգելել պարզելու Հայաստանի Հանրապետության պետական խորհրդանիշ Եռագույնը. «Եւ սա թող դաս դառնա ցանկացածի համար, ովքեր հետագայում կճգնեն արգելել Եռագույնի ծածանումը Հայաստանի որևէ տարածքում. ի պատասխան այդ արգելքի կստանան նման ակցիաներ»։

«Այսօր՝ հունվարի 19-ին, ժամը 16:00-ին հավաքվում ենք Կասկադի տարածքում, մեր հետ ունենալով եռագույն դրոշներ։ Բոլորս միասին երգում ենք Հայաստանի Հանրապետության պետական օրհներքը, նկարվում ենք միասին՝ Եռագույն դրոշներով Կասկադի սկզբնամասում, աստիճանների վրա և ամենավերին հատվածում՝ «Հասկը» կրող հուշակոթողի հարթակում՝ Արքայական Հասկի ու հավերժության նշանի ֆոնին, և ամենքս գնում մեր գործին։ Ակցիայի-ֆլեշմոբի տևողությունը առավելագույնը 30 րոպե է։ Սա կլինի սթափեցնող ապտակ բոլոր նրանց, ովքեր չեն հասկացել, թե որտեղ են ապրում և ով է Հայը»,- ասված է նախաձեռնության տարածած հայտարարության մեջ։