Ինչպես արդեն տեղեկացրել էինք, ԿԽՄԿ Բաքվի գրասենյակի ներկայացուցիչները նախօրեին այցելել են Ադրբեջանում գտնվող հայ ռազմագերի, զինծառայող Հակոբ Ինջիղուլյանին:

Ադրբեջանական լրատվամիջոցները հայտնում են, որ ԿԽՄԿ ներկայացուցիչները հայ ռազմագերուն  տեղեկատվություն են հաղորդել ընտանիքի և հարազատների մասին: 

Այս տեղեկությունն ASEKOSE.am-ի թղթակցի հետ զրույցում հաստատեց Հակոբ Ինջիղուլյանի եղբայրը՝ Հարություն Ինջիղուլյանը՝ նշելով, որ այսօր հանդիպում է տեղի ունեցել ԿԽՄԿ Երևանյան գրասենյակում, որի ընթացքում Հակոբի նամակը փոխանցվել է հարազատներին:

Նամակում մասնավորապես գրված է, որ ամեն ինչ նորմալ է, սակայն շատ է կարոտում հարազատներին.

«Սպասեք մի փոքր, ամեն ինչ լավ կլինի»:

Հիշեցնենք, որ օգոստոսի 7-ի լույս 8-ի գիշերը, ժամը 3:00-ի սահմաններում, ծառայությունն իրականացնելու ժամանակ տեղանքում չկողմնորոշվելու հետևանքով 1991թ. ծնված շարքային զինծառայող Հակոբ Գևորգի Ինջիղուլյանը, հատելով ղարաբաղա-ադրբեջանական սահմանը, հայտնվել էր հակառակորդի պահպանության տակ գտնվող տարածքում և գերեվարվել:

ՀՀ Պաշտպանության նախարար Սեյրան Օհանյանը բազմիցս հավաստիացրել է, որ եթե Հակոբը վերադառնա Հայաստան, նրան քրեական հետապնդում չի սպասվում:  

Հեղինակ՝ Հասմիկ Գյոզալյան