Քաղաքական մեկնաբան Հակոբ Բադալյանի ֆեյսբուքյան գրառումը․ «Նիկոլ Փաշինյանն օրերս ներկայացրել էր ավիացիային վերաբերող մի վիճակագրություն՝ ուղևորների աճի մասին, ինչպես նաև կառավարության նիստում հայտարարել, որ կառավարության քաղաքականության շնորհիվ հանրությունը ստացել է մատչելի ուղևորատոմսերի հնարավորություն և բազմապատիկ ավելի մեկնում է Եվրոպա:
Այստեղ կա թերևս որոշ «դասավորումների» կարիք: Նախ, Հայաստաննի ավիացիոն շուկայում ավիատոմսերի որոշակի նվազման միտումը սկսել է դեռևս մինչև 2018 թվականը, երբ Հայաստանը անցավ այսպես ասած «բաց երկնքի» քաղաքականության: Տարիների ընթացքում բնականաբար պետք է արդյունքը ստանար ավելի նկատելի դրսևորում:
Դրանից բացի, թերևս հարկ է ուշադրության արժանացնել մի էական հանգամանք ևս, որը վերաբերում է ավիացիոն ոլորտին ամբողջ աշխարհի մասշտաբով: Կովիդի համաճարակը ուժեղ հարված հասցրեց ավիացիային և դրանից հետո ավիաընկերությունները թերևս փորձեցին ձեռնարկել միջոցներ՝ արագ վերականգնման համար, այդ թվում ավիատոմսերի հնարավորինս մատչելի գների քաղաքականությամբ: Բնականաբար, դա իր ազդեցությունը պետք է ունենար նաև Հայաստանում:
Եթե խոսենք Հայաստանի ավիացիոն ոլորտի մասին, ապա այստեղ իրավիճակը բնորոշողը երկու խոշոր տապալումներն են՝ հայկական ավիաընկերությունների համար եվրոպական սև ցուցակի առկայությունը և Ֆլա Առնայի՝ ազգային ավիափոխադրողի ստեղծման նախաձեռնության տապալումը:
Ընդ որում, այս երկու տապալումներն ունեն նաև որոշակի պատճառահետևանքային կապ: Ավելին, ազգային ավիափոխադրողի ստեղծման տապալումը ըստ էության շատ ավելի խորը և բազմաշերտ պատմություն է, ոչ միայն պետական տասը միլիարդ ներդրման կորստի, այլ նաև օտարերկրյա հեղինակավոր ներդրողի հետ գործակցության անկարողության, ինչը նաև հարված է Հայաստանի ներդրումային իմիջին»։