Լեւոն Տեր-Պետրոսյանը կգնա «փողի» մոտ ...
ՀՀ առաջին նախագահ Լեւոն Պետրոսյանն ու ԲՀԿ առաջնորդ Գագիկ Ծառուկյանն առաջիկայում հնարավոր է հանդիպեն: Համենայն դեպս, նման հայտարարություններ են անում «բարձրաստիճան» ԲՀԿ-ականները եւ ԱԺ ՀԱԿ խմբակցության ներկայացուցիչները: Հանդիպման հիմքն էլ դրվել է մարտիմեկյան հավաքին, երբ Լեւոն Տեր-Պետրոսյանը Գագիկ Ծառուկյանին փորձեց «կուտ» տալ՝ նրան համեմատելով Իվանիշվիլիի հետ: Մի բան, որ ջղաձգումներ առաջացրեց հենց լեւոնական էլեկտորատի ու լեւոնամերձ շրջապատի մոտ: Բայց ի՞նչ կարող ես անել՝ Լեւոն Տեր-Պետրոսյանին «մի քիչ» փող է պետք եւ, բնականաբար, Գագիկ Ծառուկյան-Սերժ Սարգսյան հարաբերությունների վատթարացում: Ծառուկյան-Իվանիշվիլի համեմատությունն, ինչ խոսք, զավեշտալի է, բայց ԲՀԿ-ական որոշ շրջանակներ լուրջ են վերաբերվել դրան: Ավելի վաղ Գագիկ Ծառուկյանն էլ էր հայտարարել, թե պատրաստ է կորուստների, միայն չկորցնի ժողովրդի վստահությունը: Ի դեպ, ՀՀԿ-ական Էդուարդ Շարմազանովը պատահական չէր ակնարկել, թե Լեւոն Տեր-Պետրոսյանն ազնիվ չէ ԲՀԿ-ի հանդեպ, քանի որ նա Ծառուկյանին գայթակղում է Իվանիշվիլիով, բայց միտումնավոր չի հիշատակում Խոդորկովսկու անունը: Ծառուկյանը, չնայած պահի տակ ոգեւորության պոռթկումներին, կարողանում է հարկ եղած դեպքում STOP տալ, ինչպես նախորդ ընտրությունների ժամանակ որոշեց չառաջադրվել, կամ իբրեւ հավատարմության նշան, տարեվերջին հոտընկայս խմեց Սերժ Սարգսյանի կենացը: Ախր ԲՀԿ առաջնորդը աչքի առաջ ունի վառ օրինակ, թե ինչպես կարող են իշխանությունները վարվել անհնազանդ օլիգարխների հետ՝ ի դեմս Խաչատուր Սուքիասյանի: Ուրեմն ի՞նչ իմաստ ունի հանուն ընդդիմադիրի պիտակի, որը չնայած բավականին պոպուլիստական է եւ ականջ շոյող, վտանգել կուտակածը: Ի դեպ, կուտակելու առումով էլ Ծառուկյանը տարբերվում է Իվանիշվիլիից: Վերջինս այլ կերպ է աշխատել գումարները, իսկ Ծառուկյանի փողերը եկեք չհաշվենք: Մանավանդ նրա մայրը՝ տիկին Ռոզան վաղուց այդ մասին խոսել է մի առիթով շատ հայտնի հարցազրույցում ու հիմնավորել հարկերը չվճարելու պատճառները ...
