Գյումրիի դրամատիկական թատրոնի գեղարվեստական ղեկավար Նիկոլայ Ծատուրյանը հրաժարականի դիմում է ներկայացրել: Գյումրու թատրոնի պրոդյուսեր Տիգրան Վիրաբյանը Asekose.am-ի հետ զրույցում հերքել է լուրերը, թե հրաժարականը կապ ունի անցած հոկտեմբերին` ԳԱԼԱ հեռուստաընկերությանը տված Նիկոլայ Ծատուրյանի աղմկահարույց հարցազրույցի հետ: Ըստ Տիգրան Վիրաբյանի, Ծատուրյանն այս ընթացքում միշտ էլ ասել է, որ ինքը պատրաստում է թատրոնի վաղվա օրը և այնպիսի կադր, ով կկարողանա փոխարինել իրեն:
Տիգրան Վիրաբյանը նաև նշել է, որ հենց Նիկոլայ Ծատուրյանի խնդրանքով թատրոնում կատարվել է կառուցվածքային փոփոխություն. Ծատուրյանի երկար տարիների օգնական Լյուդվիգ Հարությունյանը նշանակվել է թատրոնի գլխավոր ռեժիսոր, իսկ Նիկոլայ Ծատուրյանը շարունակելու է աշխատանքը թատրոնում` որպես գեղարվետսական խորհրդատու:
Հիշեցնենք, որ դեռ անցած տարեվերջին լուրեր էին տարածվել, որ ԳԱԼԱ հեռուստաընկերությանը տված աղմկահարույց հարցազրույցից հետո` մշակույթի նախարարը պատրաստվում է պաշտոնանկ անել Նիկոլայ Ծատուրյանին` երկրում առկա իրավիճակի մասին իր կարծիքն արտահայտելու համար:
Սակայն, ըստ մամուլի հրապարակումների, թատրոնի դերասանները ոտքի էին կանգնել ու նշել, որ պատրաստ են պայքարել իրենց ղեկավարի համար` նշելով, որ եթե Ծատուրյանին ազատեն, իրենք ևս մեկ մարդու նման դիմում կգրեն ու կհեռանան:
Հիշեցնենք նաև, որ Նիկոլայ Ծատուրյանն իր հայտնի հարցազրույցում տարակուսել էր, թե որքան կարելի է լռել, ապա գործող իշխանություններին չցանկանալով ղեկավար անվանել՝ որակել էր «գեղացի, բութ, ափեղ-ցփեղ» մարդիկ:
Իսկ ամենադաժան քննադատությանը ենթարկել էր կաթողիկոսին. «Օլիգարխ Գարեգին 2-րդ: Նա այլանդակություն է, իսկական սատանա... Բա էն Կճոյան է, զահրումար է...»:
