«Օրեր առաջ մենք տեղեկացանք, որ Մոսկվայում մեր լավ ընկեր, գործարար Խորեն Ղազարյանը կորցրել է կնոջը և իր 9-ամյա աղջկան: Նախնական առաջին վարկածով Խորենի կինը` Վիկտորյա Կարագուլյանը, սպանել է իրենց աղջկան` Նինային, ապա ինքնասպանություն գործել, ինչն անհեթեթ էր, որովհետև դանակը գտել էին սպասք լվանալու մեքենայի մեջ: Հետո տեղեկացանք, որ արդեն հենց Խորենն է կասկածվում երեխայի և կնոջ սպանության մեջ: Խորենն այդպիսի բան անել պարզապես չէր կարող, որովհետև նա ուղղակի պաշտում էր իր ընտանիքին, իր աղջկան: Նա շատ խելացի, զուսպ և հիանալի նկարագիր ունեցող հայ մարդ է: Խորենը միշտ օգնության ձեռք էր մեկնում բոլոր այն մարդկանց, ովքեր Հայաստանից մեկնում էին Մոսկվա արտագնա աշխատանքի»,-Asekose.am-ի թղթակցի հետ զրույցում ասաց դրամատուրգ, սցենարիստ, երգահան Քրիստ Մանարյանը, ով Խորեն Ղազարյանի վաղեմի ընկերներից է:
Նշենք, որ ողբերգությունը տեղի էր ունեցել շաբաթ գիշերը Խորեն Ղազարյանի՝ Կրեմլին նայող մոսկովյան առանձնատանը, որտեղ հայտնաբերել էին նրա կնոջ՝ 41-ամյա Վիկտորյայի եւ աղջկա՝ 9-ամյա Նինայի մարմինները՝ դանակից ստացած հարվածների հետքերով։ Խորեն Ղազարյանը դեռևս սպանության միակ կասկածյալն է և ներկայումս ձերբակալված է, սակայն Asekose.am-ի խմբագրություն այցելած գործարարի երևանյան ընկերները ոչ միայն չեն հավատում, այլև պնդում են, որ այս դաժան սպանությունների հետ Խորեն Ղազարյանը որևէ առնչություն չունի:
«Խորենը միշտ կրկնում էր, որ եթե մարդիկ ցանկանում են իր հետ լավ հարաբերություններ ունենալ, ապա կարող են զանգել և հարցնել դստեր որպիսության մասին: Նա ուղղակի պաշտում էր 9-ամյա Նինային, ով երկար սպասված երեխա էր, չէ՞ որ, երբ նա ծնվել էր, Խորենն արդեն 41 տարեկան էր»,-մեզ հետ զրույցում ասաց Խորեն Ղազարյանի նախկին հարևանուհի Տաթևիկ Հարությունյանը: Վերջինիս խոսքով` իրենք նույնիսկ չգիտեն՝ այս ամենից հետո Խորենը կկարողա՞ ապրել, թե՞ ոչ:
Ընկերների կարծիքով` նույնիսկ Խորենը չի կարող բացատրել, թե ով կարող է այս ամենի հետևում կանգնած լինել, ըստ նրանց` որևէ մեկը չուներ նման արարք գործելու դրդապատճառ: Ընկերների պնդմամբ՝ չնայած իր կարողությանը` Խորենը շատ համեստ և հասարակ անձնավորություն էր, և ռուսական մամուլում հայտնված տեղեկատվությունը, որ Խորենը խաղամոլ էր, ուղղակի անհեթեթ է: Միաժամանակ ընկերները նշեցին, որ Խորեն Ղազարյանն արդեն մի քանի տարի ակտիվ բիզնեսով չէր զբաղվում: Անդրադառնալով Խորենի և Վիկտորյայի հարաբերություններին` ընկերները նշեցին, որ դրանք իսկապես լավն էին.
«Կնոջ համար Խորենն ուղղակի Աստված էր... Նա հրաշալի հայր և ամուսին էր, ավելին` սպանության օրը Խորենը տուն էր վերադարձել` կարծելով, որ ընտանիքի անդամները քնած են և միայն նրանց չանհանգստացնելու նպատակով էր քնել իր մեքենայի մեջ: Ոչինչ չէր հուշում սպասվող վտանգի մասին. նախքան դեպքը Վիկտորյան երեխայի հետ հեռուստացույց էր նայել, ավելին` համացանցի միջոցով Խորենի բարեկամուհիներից մեկի հետ էր շփվել… Տեղեկացնեմ նաև, որ Խորենը Վիկտորյայի հետ թեև պաշտոնապես ամուսնացած չէր, սակայն իր ամբողջ ունեցվածքը գրանցել էր նրա ծնողների անվամբ. սա խոսում է նրանց տան վստահության և համերաշխության մասին: Չեմ կարող չհիշել նաև այն դեպքը, երբ Խորենը, 8 ամիս ապրելով Երևանում և խնամելով իր հիվանդ հորը, ամեն ուրբաթ, շաբաթ և կիրակի օրերին ընտանիքին տեսնելու նպատակով մեկնում էր Մոսկվա: Ավելին` ասում էր, որ եթե Նինան սիրի Հայաստանը, իրենք անպայման Մոսկվայից կվերադառնան հայրենիք: Այսինքն` հաշվի էր նստում 9 տարեկան երեխայի կարծիքի հետ»,-ասաց Տաթևիկ Հարությանը:
Թե Քրիստ Մանարյանը, թե Տաթևիկ Հարությունյանը, թե Asekose.am-ի խմբագրություն այցելած մյուս ընկերները այժմ վրդովված են ոչ այնքան ռուսական կողմից, որքան հայկական ԶԼՄ-ներից, որովհետև նրանց խոսքերով` վերջիններս այսքան ժամանակ պարզապես կուրորեն արտատպում են այն, ինչ ներկայացնում են ռուսները.
«Ռուսական շատ լրատվամիջոցներ դեպքը ներկայացնում էին ոչ օբյեկտիվորեն, խեղաթյուրում էին շատ փաստեր: Ավելին` «Մոսկովսկի կոմսոմոլեց» պարբերականը նույնիսկ հեռացնում էր մեր թողած մեկնաբանությունները», կամ էլ գրում, որ Խորենը շատ սառնասրտորեն է մոտեցել այս ողբերգությանը, այն դեպքում, որ նրա մոտ շոկային վիճակ է: Գրում էին նաև, իբրև թե Խորենը հրաժարվել է պոլիգրաֆից` այսինքն` ստի դետեկտորից, ինչը ևս չի համապատասխանում իրականությանը: Ստացվում է. որ ռուսները ստեղծում են այդ բացասական մթնոլորտը Խորենի անվան շուրջ, հայկական կողմն էլ անուշադրության է մատնում, որ Խորենը մեր լավ հայրենակիցն է, և առանց որևէ հետաքննության թարգմանաբար ներկայացնում է նրանց վարկածները»-Asekose.am-ին ասացին վրդովված ընկերները:
Հավելենք նաև, Խորեն Ղազարյանի ընկերները և հարազատները համոզված են, որ, ի վերջո, հետաքննությունը կապացուցի Խորենի անմեղությունը:
Առավել մանրամասն` տեսանյութում
Հեղինակ` Լիլիթ Հակոբյան