Տնտեսագետ, նախկին պատգամավոր Վարդան Բոստանջյանը համոզված է՝ հայ ժողովուրդն իր միասնականությամբ ցույց տվեց, որ այս երկրի տերն է.
«Մենք հասկացանք, որ կառավարման համակարգը գոյություն չունի, այսպիսի կառավարում մարդակերներն էլ չեն ունեցել: Առնվազն 300-400 միլիոն դոլարի պարագայում արդիական զենքեր կունենայինք, ոչ թե ձեռքով դուրս կգայինք թշնամու դեմ:
Պետք է համակարգային փոփոխություն իրականացնել, վերջացնել նվնվոցը, աթոռի համար հուզվելը: Պետական ապարատում ով չի ալարում՝ սպասարկող մեքենա ունի, իսկ այդքան գումարը կարող է օգտագործել՝ երկու անօդաչու թռչող սարք գնելով»,-նկատեց տնտեսագետը:
ՀՀԿ-ական պատգամավոր Վարդան Այվազյանն ընդունում է, այն զինվածությունը, որ ունենք, չի համապատասխանում այսօրվա պահանջներին.
«300 միլիոնով ոչինչ չես կարող գնել: Ինչ վերաբերում է ծառայողական մեքենային, ապա իմն արժե 35.000 դոլար։ Ամենամեռած թռչող սարքն այսօր 100.000 դոլարից շատ է։ Ինձ որ մնա՝ եկեք բոլոր մեքենաներն էլ հանենք: Այս խնդիրների համար պատասխանատուն բոլորս ենք։ Եթե Այվազյան Վարդանն է մեղավոր, թող առաջինն ինձ կախեն»,-ասաց պատգամավորը՝ նշելով.
«Բյուջեին վերաբերող հոդվածներում պետք է փոփոխություն կատարել: Բանակն ուժեղացնելու և նոր զենքեր գնելու համար,կարելի է գումար տնտեսել բոլոր ոլորտներում։ Դպրոցաշինության 25 տարվա ծրագիր ունենք։ Գյուղում մարդ չի մնացել, 25 տարվա ծրագիր ենք անում։ Դա վերջանում է, նորից ենք ծրագիր անում: Բոլոր խավերի ու ուժերի համախմբում է անհրաժեշտ: Թյուր կարծիքը, թե մեծ ախպերը մեզ պետք ա գա, պահի, մեկ անգամ ևս հօդս ցնդեց: Պետք չէ նեղանալ Ռուսաստանից: Մենք իրեն այնքանով ենք պետք, ինչքան որ ինքը՝ մեզ»:
Անի Կարապետյան
