Հայտնի փաստ է, որ կանանց շրջանում գերիշխում է կրծքագեղձի քաղցկեղը, իսկ տղամարդկանց շրջանում՝ թոքի քաղցկեղը: Քաղցկեղի որ տեսակներն են բնորոշ կանանց և որոնք՝ տղամարդկանց. պարզաբանում է «Էրեբունի» ԲԿ ուռուցքաբանության գծով փոխտնօրեն Հայկուհի Գյոքչյանը:
Հայաստանում տարեկան հայտնաբերվում է կրծքագեղձի քաղցկեղի 1000-1200 նոր դեպք: Թոքի քաղցկեղն առավել տարածված է տղամարդկանց շրջանում՝ կապված ծխելու, անառողջ ապրելակերպի հետ: Ի տարբերություն կրծքագեղձի քաղցկեղի՝ այս հիվանդության դեպքում բուժելիությունն առավել ցածր է, քանի որ թոքի քաղցկեղը հիմնականում հայտնաբերվում է ուշ փուլերում: Ուռուցքաբանը խորհուրդ է տալիս` ուշադիր լինել առողջությանը, պարբերաբար հետազոտվել՝ չսպասելով հիվանդության զարգացմանը:
