Տեղեկացրել էինք, որ 102 կողմ, 3 դեմ, 0 ձեռնպահ ձայների հարաբերակցությամբ ԱԺ-ն 1-ին ընթերցմամբ ընդունել է ՀՀ պաշտպանությանը, մարտական գործողությունների ժամանակ վնասներ ստացած զինծառայողներին ամսական աշխատավարձից հազար դրամ պարտադիր փոխանցում կատարելու մասին նախագիծը:
«Զարմանում եմ, որ չի խոսվում կամավոր կերպով օժանդակելու մասին: Ավելին, ոչ թե 1000 դրամ, այլ յուրաքանչյուրի եկամտի մեկ տոկոսի հատկացման մասին պետք է խոսել: Այս դեպքում մի քանի անգամ շատ կլինի գումարի չափը»,-Asekose.am-ի թղթակցի հետ զրույցում ասաց ԱԻՄ առաջնորդ Պարույր Հայրիկյանը՝ և մեկ առաջարկ ներկայացնելով.
«Ճանապարհային երթևեկության կանոնների խախտումների համար գանձվող գումարների 10 տոկոսն էլ նպատակին վատ չի ծառայի: Կմխիթարվեինք նրանով, որ այդ թալանից մի բան էլ զինվորին կարող է հասնել»:
Իսկ, թե իրականում ինչո՞ւ է այս նախագիծն առաջ քաշվել, Պարույր Հայրիկյանն էլ չի հասկացել.
«Մի՞թե կարելի է տրամաբանություն փնտրել հազիվ քայլել սկսող անգիտակից կամ վատ դաստիարակված երեխայի վարքում»,-հարցրեց նա:
Հավելենք, որ 1000 դրամի օրինագծի նկատմամբ հասարակական քննադատությունը կարծես թե որոշել են հաշվի առնել: Նախագիծը երկրորդ ընթերցման ժամանակ կլինի շտկումներով.
«Այս պահին չեմ կարող ասել, թե որ կետերն են փոփոխվել, բայց որոշ բաներ, իհարկե, փոխվել են»,- լրագրողներին ասել էր ՊՆ խոսնակ Արծրուն Հովհաննիսյանը։
Անի Կարապետյան
