ԱԺ ընդդիմադիր խմբակցության պատգամավոր Լևոն Քոչարյանը ֆեյսբուքյան իր էջում գրել է․ «Լրագրող Թաթուլ Հակոբյանը անդրադարձել է իմ վերջին գրառմանը Մեղրիի հետ կապված: Շնորհակալ եմ անդրադարձի համար, ինչպես նաև գրածներիս մեծ մասի հետ հրապարակային համաձայնություն հայտնելու համար: Այնուամենայնիվ պարոն Հակոբյանը անհամաձայնություն է հայտնել միայն 3-րդ կետի հետ կապված, նշելով, որ Հայաստանի տարածքը այդ մասում Արաքսի ափով 8 մետր կարճանում է (մոտավոր 35 հեկտար): Չգիտեմ, թե ինչ փաստաթղթի վրա հիմնվելով է պարոն Հակոբյանը նման բան ասում, սակայն կարող եմ միանշանակ ասել հետևյալը. 2001թ. ապրիլին, երբ Հայաստանի և Ադրբեջանի նախագահները ժամանել են Քի Վեսթ, համանախագահները նրանց են հանձնել կարգավորման փաթեթի վերջին տարբերակը: Այդ փաստաթղթում Ադրբեջանին տրվող սուվերեն անցումի (ճանապարհի) մասով գրվել է հետևյալը. ճանապարհի բոլոր հնարավոր տեղերում պետք է կառուցել էստակադաներ կամ թունելներ (երևի թե սրա կարիքը չէր էլ լինելու, ամեն դեպքում գրված էր), որպեսզի չխոչընդոտվի հայկական բնակավայրերի և կոմունիկացիաների բնականոն ընթացքը: Ինչպես նաև հատուկ գրված էր, որ տրվող ճանապարհի տակի ոչ հողը, ոչ ընդերքը, և ոչ էլ ճանապարհի վրայի օդային տարածքը Ադրբեջանին չեն անցնում: Ավելի պարզ ասած սա նշանակում է, որ այդ ճանապարհը քարտեզի վրա չէր նշվելու որպես Ադրբեջան»։

Լրագրող Թաթուլ Հակոբյանի ֆեյսբուքյան գրառումը` ստորև․ «Ազգային ժողովի «Հայաստան» խմբակցության պատգամավոր Լևոն Քոչարյանը Ֆեյսբուքի իր էջում, անդրադառնալով Մեղրիի տարբերակին, 8 կետով փաստեր ու մեկնաբանություններ է թողել:
Հարգարժան պատգամավորի այդ 8 կետերից մեծ մասին հետ համաձայն եմ, քանի որ, իրավամբ, փաստեր են:
Սակայն համաձայն չեմ պարոն Քոչարյանի երրորդ կետի հետ, որով, պատգամավորի խոսքերով, Ադրբեջանին ընդամենը վերգետնյա ճանապարհ (էստակադա) էր տրամադրվելու Մեղրիով:
Ես կարող եմ պարոն Քոչարյանին ցույց տալ մի քանի փաստաթղթեր, ի դեպ, դրանք ինքն էլ կարող է ձեռք բերել ՀՀ ԱԳՆ-ից, որոնք ցույց են տալիս, որ բանակցային հետագա փուլերում՝ 2001-ին, Հայաստանը գնացել է էլ ավելի փոխզիջումների՝ համաձայնվելով, որ Հայաստանի տարածքը նեղանա 8 մետրով, ուղղակի մեջբերում ՝ Armenia’s territory would be shortened at 8 meters.
Բնական է, խոսքը վերաբերում է Արաքսի ափին:
Պարոն Քոչարյանի 8 կետերից 7-ի հետ հարյուր տոկոսով կամ գրեթե հարյուր տոկոսով համաձայն եմ»։