Այսօր տեղի ունեցավ Վանաձորի ֆուտբոլի ակադեմիայի բացման հանդիսավոր արարողությունը, որից հետո Հայաստանի ֆուտբոլի ֆեդերացիայի նախագահ Ռուբեն Հայրապետյանը պատասխանեց Վանաձոր ժամանած լրագրողների հարցերին:
-Պարոն Հայրապետյան, նախ շնորհավորում ենք Վանաձորի ակադեմիայի բացման կապակցությամբ: Ի՞նչ հետագա պլաններ կան. Ո՞ր քաղաքներում և մարզերում է նախատեսվում կառուցել ակադեմիաներ և մարզադաշտեր: (Արմենպրես)
-Շնորհակալություն: Հիմա Սևան քաղաքում կառուցվում է արհեստական խոտածածկով մարզադաշտ, այնուհետև կառուցելու ենք Սիսիան և Գորիս քաղաքներում: Ֆուտբոլի ակադեմիա ենք կառուցում Էջմիածին քաղաքում, որի շինարարական աշխատանքներն արդեն սկսվել են: Կարծում եմ՝ այն շահագործման կհանձնենք եկող տարի՝ այս ժամանակ: Չարենցավանում արդեն ավարտել ենք արհեստական խոտածածկով մարզադաշտի շինարարությունը: Նպատակ ունենք Հայաստանի բոլոր մարզերում կառուցել արհեստական խոտածածկով խաղադաշտեր: Բացի դրանից, ՀՀ նախագահը հանձնարարել է նաև կառուցել Վանաձորի ֆուտբոլի մարզադաշտը: Հաջորդ գարնանը կսկսենք նաև այդ կառույցի շինարարությունը:
-Ի՞նչ օգուտ կարող է տալ ակադեմիաների շինարարությունը մեր ֆուտբոլին (Արմենիա TV)
-Ֆուտբոլն այն մարզաձևն է, որտեղ չես կարող գումարներ ներդնել և միանգամից արդյունք ստանալ: Ֆուտբոլը ժամանակատար մարզաձև է: Ֆուտբոլով սկսում են մարզվել 6 տարեկանից և պրոֆեսիոնալ են դառնում 18-20 տարեկանում: Հենց այդ պատճառով մեզ հարկավոր է ժամանակ: Որքան շատ լինեն այսպիսի ակադեմիաները և մարզադաշտերը, մենք հետագայում քանակից կստանանք որակ: Հենց այսպիսի մարզադաշտերում են ծնվելու նոր Հենրիխ Մխիթարյաններ:
- Ովքե՞ր են լինելու Արթուր Պետրոսյանի օգնականները Հայաստանի ազգային հավաքականում: (Արմենիա TV)
- 2-3 օրից, երբ ես կներկայացնեմ Արթուր Պետրոսյանին, նա կներկայացնի իր մարզչական շտաբը: Ես նշանակում եմ միայն գլխավոր մարզչին, իսկ ինքը որոշում է իր օգնականներին: Նույնիսկ երիտասարդական հավաքականի մարզչին և օգնականներին է նշանակում: Միշտ է այդպես եղել:
-Պարոն Հայրապետյան, ինչո՞ւ է ընտրությունը կանգնել հենց Արթուր Պետրոսյանի վրա: (Արմենպրես)
- Արթուր Պետրոսյանն արդեն 10 տարի է՝ զբաղվում է մարզչական գործով, բացի այդ այս տարի ստացել է մարզչական ՊՐՈ արտոնագիր: Պետրոսյանը ժամանակին եղել է մեր հավաքականի առաջատարներից մեկը, և ես գտնում եմ, որ արդեն ժամանակն է, որ Արթուր Պետրոսյանը գլխավորի մեր հավաքականը:
-Կարո՞ղ եք հրապարակել մանրամասներ մարզչի պայմանագրի հետ կապված, թե՞ դա գաղտնի տեղեկատվություն է: (Արմենիա TV)
-Ոչ մի գաղտնի բան չկա: Մարզչի հետ կնքվել է երկու տարվա պայմանագիր: Եթե լինի հաջողություն, հետագայում կերկարաձգենք պայմանագիրը:
- Դուք միշտ նշել եք, որ հավաքականի մարզիչն ինքն է որոշում թիմի կազմը: Այս դեպքում արտոնությունը տրվա՞ծ է Արթուր Պետրոսյանին: (Արմենիա TV)
-Իհարկե, բացառությամբ այն դեպքերի, երբ ես գտնում եմ, որ ֆուտբոլիստը կարող է խախտել հավաքականի կարգապահությունը և վնաս բերել հավաքականին: Օրինակ Յուրա Մովսիսյանը և Ռոբերտ Արզումանյանը չեն կարող լինել հավաքականում: Որքան էլ որ մարզիչն ուզի, իմ իրավունքն է թույլ չտալ հրավիրել նման ֆուտբոլիստների:
-Պարոն Հայրապետյան, ի՞նչ սպասելիքներ ունեք հավաքականի առաջիկա խաղից:(Արմենպրես)
-Փայլուն խաղ, հաջող խաղ, ցանկանալու եմ, որ հավաքականը լավ ելույթ ունենա, իսկ թե ինչպես կլինի չեմ կարող ասել, որովհետև գուշակություններով երբեք չեմ զբաղվել: Սրտանց ուզում եմ, որ հաղթենք:
-Հայաստանի մինչև 21 տարեկանների հավաքականը շատ վատ հանդես եկավ Եվրոպայի առաջնության ընտրական փուլում՝ վաստակելով ընդամենը մեկ միավոր: Մենք անընդհատ կառուցում ենք ակադեմիաներ և մարզադաշտեր, բայց երիտասարդական ֆուտբոլի արդյունքների վրա դա դեռևս ազդեցություն չի թողնում: Դա Ձեզ մտահոգո՞ւմ է: (Արմենիա TV)
- Մեր երիտասարդական հավաքականն իր հնարավորություններից շատ ցածր հանդես եկավ: Երբ գլխավոր մարզիչը գա, մենք կքննարկենք նաև երիտասարդական հավաքականի հետ կապված հարցերը: Մենք ունենք պոտենցիալ, ունենք շատ լավ ֆուտբոլիստներ, որոնք կարող էին խաղալ նույնիսկ ազգային հավաքականում, ունեինք 4-5 ֆուտբոլիստներ, որոնք չէին հրավիրվում հավաքական: Եթե ուշադրություն դարձնենք, Հայաստանի առաջնությունում ունեինք բազմաթիվ տաղանդավոր ֆուտբոլիստներ, որոնք չէին հրավիրվում հավաքական, կամ հրավիրվում և չէին ընդգրկվում հիմնական կազմում: Իրոք, ձախողվել ենք, բայց ոչ թե ֆուտբոլիստ չունենալու պատճառով, այլ բազմաթիվ խնդիրների պատճառով:
- Ի՞նչ ազդեցություն կուևենա ՈՒԵՖԱ-ի նախագահի պաշտոնում Ալեքսանդր Չեֆերինի ընտրվելը: (Արմենիա TV)
-Ես կարծում եմ, որ լուրջ և դրական փոփոխություևններ կլինեն: Նա ունի շատ լավ ծրագրեր, որոնք կփորձի իրականացնել ապագայում:
-Պարոն Հայրապետյան, տեղական իշխանությունների հետ քննարկե՞լ եք Վանաձորում նրանց կողմից թիմ ստեղծելու հարցը: («Լոռու մարզ»)
-Իմ կարծիքով, շատ վատ է, երբ պետական մարմինը պահում է սեփական թիմ: Ռուսաստանի առաջնությունում 16 թիմերից չորսն է սեփական թիմ, մնացածը ֆինանսավորվում են պետական միջոցներով: Նույն պատկերն է Ղազախստանում կամ Ադրբեջանում, բայց արդյունք չկա: Դրա փոխարեն լավ կլիներ, եթե Լոռու մարզի գործարարներից մեկին բոլորով խնդրեինք թիմ պահել:
Ես կուզեի կրկին անդրադառնալ հավաքականի մարզչի հարցին: Շատ վատ է, որ երկրպագուներն անհամբեր են և խաղը դեռ չսկսած՝ գոռում են «Սուքիասյան, հեռացիր», կամ մեկ այլ մարզչի անուն են վանկարկում: Այնպես են անելու, որ ոչ մի մարզիչ չուզի գլխավորել Հայաստանի ազգային հավաքականը, ինչպես որ դա, օրինակ, Վարդան Մինասյանի պարագայում է, որը չի ուզում լսել հավաքականի անունը, մարզչի անունը: Այսինքն, ոչ ոք հաշվի չի առնում, թե ինչու է հավաքականը վատ խաղում, որ 5-6 ֆուտբոլիստներ վնասվածքներ ունեն, առաջատար ֆուտբոլիստից սկսած վնասվածքներ ունեն և խաղը չսկսած՝ սկսում են վանկարկել «Սուքիասյան, հեռացիր» : Ո՞վ է ասել, որ Հայաստանի հավաքականը պետք է հաղթի բոլոր խաղերում: Ցանկալի կլիներ, բայց դա հնարավոր չի: Մեր երկրպագուները դարձել են փորձանք հավաքականի գլխին: Երբ հավաքականը հաղթում է, երկրպագուները դա վերագրում են իրենց, իսկ երբ պարտվում է, մեղավոր է մարզիչը և ֆեդերացիայի նախագահը: Ես չեմ հասկանում նաև, թե ինչի համար են երկրպագուները կեղտոտ հայհոյանքներ մարզչին և ֆեդերացիայի նախագահին սոց. ցանցերում: Մենք էլ ընտանիքներ ունենք և ոչ մեկի համար էլ հաճելի չէ կարդալ նման հայհոյանքներ: Հավաքականի համար հենց սկզբից ամեն ինչ վատ դասավորվեց, երկրորդ րոպեին մնացինք 10 ֆուտբոլիստներով: Բայց ոչ ոք չի մտածում դրա մասին և միանգամից սկսում ենք քարկոծել մարզչին:
-Պարոն Հայրապետյան, ի՞նչ եք խորհուրդ տալիս երկրպագուներին նման իրավիճակում (Արմենիա TV)
-Հորդորում եմ միանգամից չհարձակվել մարզչի վրա, այլ լսել նրան: Եթե չլինի պատճառ, կամ մարզիչը սխալ բաներ արած լինի, ես կհասկանամ նրանց, բայց մարզիչն ի՞նչ անի, եթե այդքան ֆուտբոլիստներ վնասվածքներ ունեն: Կային ֆուտբոլիստներ, որոնք ընդհանրապես հավաքականի մարզաշապիկը կրելու իրավունք չունեին, բայց մարզիչն ստիպված էր նրանց հրավիրել, որովհետև ֆուտբոլիստների պակաս կար և պետք էր լրացնել հայտացուցակը: Ես դեռ չեմ խոսում այն ֆուտբոլիստների մասին, որոնք նա ցանկանում էր հրավիրել, բայց խաղին 1-2 օր մնացած վնասվածք էին ստանում, կամ հենց խաղից առաջ՝ մարզման ժամանակ էին վնասվածք ստանում: Եվ փոխանակ այսպիսի պայմաններում երկրպագուները թիմի կողքին լինեն, ավելի են հոգեբանորեն ճնշում թիմին և ֆուտբոլիստներին: Առաջին խաղակեսի 10-րդ րոպեից գոռում են «Սուքիասյան, հեռացիր», կամ գոռում են «ֆուտբոլ ենք ուզում»: Հոկե՞յ էին խաղում այդ ֆուտբոլիստները: Այդքանից հետո ինչպե՞ս պետք է խաղան ֆուտբոլիստները: Բնական է, որ ես կարող եմ դիմանալ, կամ նույնիսկ մարզիչը, բայց երիտասարդ ֆուտբոլիստներն ինչպե՞ս դիմանան այդպիսի ճնշմանը:
-Պարոն Հայրապետյան, Արթուր Պետրոսյանը շանս կստանա՞ երկար աշխատել հավաքականի հետ: (Արմենիա TV)
-Իհարկե: Ես նրան առաջարկեցի 4 տարով պայմանագիր կնքել, բայց նա ինքը խնդրեց ինձ պայմանագիր կնքել մինչև այս ընտրական փուլի ավարտը՝ նշելով, որ հաջողության դեպքում կմնա և կշարունակի աշխատանքը, իսկ անհաջող ելույթների դեպքում՝ ոչ:
- Մենք անընդհատ փոխում ենք մարզիչներին, չկա՞ օտարերկրացի մարզիչ հրավիրելու միտք: (Արմենիա TV)
-Օտարերկրացի մարզիչ կունենանք, երբ կունենանք ֆեդերացիայի օտարերկրացի նախագահ: Ցանկություն չունեմ այլազգի մարզչի վստահել հավաքականի գլխավոր մարզչի ղեկը: Իմ փորձից ելնելով՝ կարող եմ ասել, որ օտարազգի մարզիչները միայն վնաս են տվել հավաքականին: Արթուր Պետրոսյանը երկար տարիներ խաղացել և աշխատել է արտերկրում և փայլուն որակներ է դրսևորել: Չնշանակե՞նք նրան, որովհետև հայ է:
-Ի՞նչ կասեք Հենրիխ Մխիթարյանի խնդրի մասին:
- Չեմ կարող պատասխանել այդ հարցին, որովհետև չգիտեմ, թե ինչ է կատարվում Մոուրինյոյի գլխում: Ես խոսել եմ Մխիթարյանի հետ, և նա ինքն էլ չգիտի պատճառը: Նա նորմալ մարզվում է, լավ մարզավիճակում է, բայց ոչ ոք չի հասկանում, թե ինչու նա չի խաղում: («Լոռու մարզ»)
-Հայաստան-Ռումինիա հանդիպումից առաջ երկրպագուները փորձել էին ցեղասպանության նվիրված պաստառ մտցնել խաղադաշտ, սակայն նրանց թույլ չէին տվել: Հնարավոր չէ՞ր թույլ տալ մտցնել այդ պաստառը: (www.armsport.am)
- Իհարկե ոչ: Հնարավոր էր միայն մի դեպքում, եթե ֆեդերացիան վճարեր տուգանքներ, կամ մենք պատրաստ լինեինք, որ Հայաստանի՝ ՖԻՖԱ-ի և ՈՒԵՖԱ-ի կողմից թույլատրված միակ մարզադաշտը պետք է որակազրկվի:
