ՍԴ-ում շարունակվում է Կուտակային կենսաթոշակների մասին օրենքի որոշ կետերի սահմանադրականության վերաբերյալ գործի դատաքննության երկրորդ փուլը: Որպես պատասխանող կողմ հանդես եկավ ՀՀ աշխատանքի և սոցիալական հարցերի նախարար Արտեմ Ասատրյանը:

ՍԴ նախագահ Գագիկ Հարությունյանը նշեց, որ մի շարք հարցերի համար չի կարողանում պատասխաններ գտնել՝ հարցեր ուղղելով նախարարին :

ՍԴ նախագահի խոսքով՝ Կուտակային կենսաթոակի սխեմայի շրջանակներում մուծվող գումարը  նվազեցվող եկամուտ է համարվում և հարկվում է, նվազեցվող եկամուտ է համարվում նաև պետության կողմից հարկ վճարողների համար կատարված կուտակային պարտադիր վճարը իսկ հարկ վճարողի կողմից կատարված պարտադիր վճարը չի հարկվում:

Ի պատասխան այս դիտարկմանը՝  աշխատանքի և սոցիալական հարցերի նախարար Արտեմ Ասատրյանը նշեց, որ սա աշխարհում ընդունված երեք մոդելներից մեկն է:

«Տվյալ դեպքում մենք ընդունել  ենք հետևյալ մոտեցումը, որ գումարը հարկվում է սկզբից: Պարտադիր  կուտակային վճարը գանձվում է բազային եկամտից՝  առանց եկամտային հարկը հանելու:  Սա ընդունված մոտեցումներից մեկն է, որ գումարը, եկամուտը սկզբից հարկվում է, իսկ հետագայում ներդրումներից  եկող եկամուտները չեն հարկվում:   Գոյություն ունեն այլ մոդելներ ևս: Մենք կարծում ենք, որ մեր կողմից ընդունվածը շատ ավելի արդյունավետ է՝  եկամտաստեղծ գործունեության տեսանկյունից»:  

Անդրադառնալով նվազագույն աշխատավարձերին՝ Գագիկ Հարությունյանը նշեց, որ հարցը փորձելու է ձևակերպել հնարավորինս հստակ՝ 45 000 հազար դրամ նվազագույն աշխատավարձ ստացողն  ի՞նքն է պատադիր կուտակայինը վճարելու, թե գործատուն:

Նախարարը, պատասխանելով հարցին, նշեց, որ կուտակային պահումները վերաբերվելու են նաև նվազագույն ախատավարձին, ապա անդրադարձավ նվազագույն աշխատավարձի ինստիտուտի փոփոխություններին: Նրա խոսքով՝

«Նախկինում նվազագույն աշխատավարձը նվազեցվում  էր եկամտից, ապա կատարվում էր եկամտահարկի վճարում: Այս մոտեցումը մեր գնահատմամբ  անհավասար պայմաններ էր ստեղծում 2  տարբեր գործատուների մոտ նվազագույն  աշխատավարձով աշխատող անձանց համար:

Մենք այսօր դեռևս ունենք  աշխատող աղքատներ երևույթը:  Հայաստանում նվազագույն աշխատավարձը զերծ է հարկերից,  իսկ պարտադիր կուտակային վճարը հարկ չէ, դա  անձի հետաձգված  աշխատավարձն է»:

Գագիկ Հարությունյանն էլ իր հերթին նշեց՝  իր համար պարզ  է, որ  Կառավարությունն այսօր օրենսդրական  լուծումն իրականացրել է այն եղանակով , որ վճարումներ անի նաև նվազագույն աշխատավարձ ստացողը։