Ալեքսանդր Սպենդիարյանի անվան Oպերայի եւ բալետի ազգային ակադեմիական թատրոնի նախկին տնօրեն, գեղարվեստական ղեկավար Կոստանտին Օրբելյանը չի ցանկանում բարձրաձայնել ՀՀ ոստիկանության Շենգավիթի բաժնում քննվող գործի մասին:
«Հայկական ժամանակ»-ն է գրում և նշում, որ վերջինս զրույցում հայտնեց, որ իր իրավաբաններին է հանձնարարել զբաղվել: «Նրանք վերահսկում են իրավիճակը, ես այս պահին արձակուրդի մեջ եմ եւ երկրում չեմ»,-ասաց նա՝ հավելելով, որ ավել բան ասել չի ցանկանում:
Ավելի վաղ հայտնել էինք, որ Օրբելյանը Երեւան քաղաքի Շենգավիթ վարչական շրջանում գտնվող նոտարական գրասենյակներից մեկում կնքված առք ու վաճառքի պայմանագրով Գ. Մ.-ին պարտքով 600 000 ԱՄՆ դոլար է փոխանցել։ 3 տարի անց նա իրավապահներին հայտնել է, որ Գ. Մ.-ն խաբեությամբ եւ իր վստահությունը չարաշահելով՝ տիրացել է այդ գումարին:
Կոնստանտին Օրբելյանն ամեն կերպ փորձում է կատարվածը ուշադրության կենտրոնից հեռացնել: Մեր տեղեկություններով՝ նա անգամ գումարի չափը չի ցանկացել ոչ ոքի հայտնել՝ ասելով, որ այն իրականում 600 000 ԱՄՆ դոլար չէ:
ՀՀ Ոստիկանության լրատվության բաժնից հայտնում են, որը վերը նշված գումարի թիվը ճիշտ է եւ Օրբելյանը դիմել է իրավապահներին՝ հայտնելով, որ խարդախության զոհ է դարձել։ Հայտնեցին, որ դեպքը տեղի է ունեցել 2016 թվականին: Օրբելյանն այդ մասին դիմում է ներկայացրել Քննչական կոմիտեի նախագահին: Այնտեղից դիմումը փոխանցվել է ոստիկանություն։ Այս պահին ոստիկանության Շենգավիթի բաժնում նյութեր են նախապատրաստվում:
Նյութը՝ սկզբնաղբյուր կայքում
