TCFD հետազոտություն անցկացնելու պատճառը միջազգային ստանդարտներին համահունչ քայլեր անելն է, եւ սա առաջին քայլերից մեկն է եւ Հայաստանում դեռեւս միակն է: Այս մասին, այսօր՝ դեկտեմբերի 19-ին, Զանգեզուրի պղնձամոլիբդենային կոմբինատի (ԶՊՄԿ) զարգացման թեմային նվիրված համաժողովի ժամանակ լրագրողների հետ զրույցում նշեց կոմբինատի կայուն զարգացման գծով տնօրեն Արմեն Ստեփանյանը։
«Սա զուտ բիզնես որոշում է եղել, որ նախահարձակ լինենք եւ չսպասենք, որ ինչ-որ մեկը պահանջի, նոր անենք: Լավագույն փորձն աշխարհում պահանջում է, որ ունենանք այսպիսի հաշվետվողականություն, եւ մենք դրա հետեւից գնում ենք:
Բացեր բացահայտել ենք, օրինակ, մեր որդեգրած ռազմավարության մեջ ինչ փոփոխություններ, շտկումներ պետք է անենք, որպեսզի այն համապատասխանեցնենք ստանդարտին, որին տենչում ենք հասնել:
Աշխատանքային անվտանգությունը դեռեւս մնում է ամենաշատ աշխատանքը կատարելու հարթակը: Թեեւ մեծ հաջողություններ ենք արձանագրել վերջին մեկ տարում: Բայց աշխատանքային անվտանգության մշակույթ ձեւավորելու տեսանկյունից, իհարկե, շատ երկար ճանապարհ դեռ պետք է անցնենք: Այստեղ մենք փոխզիջում չենք անում»,-ասաց նա:
Դիտարկմանը, որ ՀՀ-ում հանքարդյունաբերության ոլորտում աճի տեմպերը մի քանի անգամ զիջում են տնտեսության աճի տեմպերին, Արմեն Ստեփանյանն ասաց. «Հարցի լուծումը պետք է փնտրել միջազգային կապիտալ ներգրավելու, նոր հանքավայրեր գտնելու եւ շահագործելու մեջ: Նոր փորձ բերելով` հին հարցերը լուծում ենք: Նոր, միջազգային չափանիշներով շահագործվող հանքավայրերը խնդրի լուծում են, ոչ թե խնդիր: Ճիշտ հակառակը, ինչը ներկայացվում է մեր հանրությանը: Միջազգային կապիտալն իր հետ բերում է նոր պահանջներ, նոր մշակույթ»:
Դիտեք նաև՝
