Ավելի վաղ տեղեկացրել ենք, որ «Ազատություն» ռադիոկայանի տեղեկություններով, Հայաստանի զինված ուժերը համալրվել են համազարկային կրակի հրթիռային նոր համալիրներով, որոնց հեռահարությունը հասնում է մինչև 130 կիլոմետրի:

Խոսքը  չինական արտադրության AR1A համալիրների մասին է, որոնք համարվում են ռուսական  «Սմերչ» համալիրների արդիականացված տարբերակը: Զինատեսակի առանձնահատկությունների ու հնարավորությունների մասին ASEKOSE.am-ի թղթակիցը զրուցել է ռազմական փորձագետ Հրաչյա Պետրոսյանցի հետ.

Մեր զրուցակիցը նախ շեշտեց, որ մինչ այս պահը դեռ  հստակ պաշտոնական հայտարարություն չի եղել այն մասին, որ  հայկական զինված ուժերը նման սպառազինություն են ձեռք բերել:

Ինչ վերաբերվում է զինատեսակի նկարագրությանը, փորձագետի խոսքով`

«Նման համակարգերը համազարկային հարձակման ռեակտիվ հրթիռային կայանքներ են, որոնք նախատեսված են մեծ կենդանի ուժի թեթև զրահահավորված տեխնիկայի ոչնչացման համար: Դրանք  հիմնականում օգտագործվում են տեղակայման վայրերը հրետակոծելու և այլ նպատակներով:  Վերջին տարիների պատերազմի փորձը ցույց է տվել, որ հիմնականում կիրառվում են բնակավայրերի հրետակոծման նպատակով: Նախատեսված են  մարտավարական բարձր օղակի  խնդիրների կատարման համար: Չինական համակարգերը  «Սմերչից» ավելի  արդյունավետ են, քանի որ ավելի հեռահար են: Հեռահարությունը հասնում է 130 կմ-ի: Պարզապես նմանատիպ  կայանքները հստակ ճշգրտություն չունեն: Այսինքն` չեն կարող հստակ նշանակետին հարվածել: Հենց այդ պատճառով  դրանք չի կարելի օգտագործել  որևէ օբյեկտի կետային խոցման համար: Իսկ բավական մեծ տարածության վրա կենտրոնացած կենդանի ուժի ուղղությամբ կրակ արձակելու դեպքում զինտեխնիկան բավական արդյունավետություն ունենում է: Չինական համակարգը  ռուսական «Սմերչի» արդիականացված տարբերակն է` որոշակի փոփոխություններով»,- մեզ հետ զրույցում նշեց Հրաչյա Պետրոսյանցը` հավելելով.

«Եթե մենք նման համակարգեր ենք ձեռք բերել, կամ ձեռք  բերելու, մենք ցույց ենք տալիս, որ ոչ մի բանով հետ չեք մնում Ադրբեջանից: Մեր ունեցած հրթիռահրետանային միջոցները ավելի  հզոր են, ավելի հեռահար, քան Ադրբեջանինը:  Մեր մասնագետների աշխատանքի շնորհիվ շեղման տոկոսը զգալիորեն կրճատվել է»:

Անդրադառնալով «Սմերչի» վերաբերյալ բարձրացված աղմուկին` փորձագետը շեշտեց, որ համակարգն իրականում  այդքան հզորութուն չունի, ինչպես ռուսական կողմն է ներկայացնում:

«Իհարկե,  մարտական գործողութունների ընթացքում դրանք  բավական մեծ վնասներ կարող են հասցնել, բայց ցանկացած մարտական գործողությունների պլանավորման ժամանակ այդ ամենը հաշվի է առնվում և  դրա դեմ միջոցներ են ձեռնարկվում:  Բացի դրանից`Ադրբեջանը «Սմերչի»  այնպիսի քանակություն չունի, որ դրանք տեղակայվեն  առաջնագծում: Դրանք գտնվելու են կենտրոնական հրամանատարության ենթակայության ներքո: Ցանկացած տեղաշարժի մասին կարելի է շատ արագ իմանալ և նույնսկ թույլ չտալ, որ դուրս գան հարձակման դիրքեր»:

Դիտարկմանը, թե համակարգի ձեռքբերման տեղեկությունը տարբեր կերպ է մեկնաբանվել, ոմանց մոտ ոգևորություն է առաջացրել,   ոմանք էլ անլուրջ մոտեցում են դրսևորել` շեշտելով դրանց չինական լինելը, փորձագետը պատասխանեց.

«Ես չեմ կարծում, որ որևէ զենքի կարելի է անլուրջ վերաբերվել: Անկախ նրանից, թե որ երկրի արտադրություն է,  զինատեսակը չի կարող լինել քմծիծաղի կամ կասկածների առարկա:  Ցակացած զինտեխնիկա կարող է նպատակային աշխատել: Ես չգիտեմ, թե  ինչու  նման կարծիք կա, որ եթե չինական է, լավը չէ: Նույն հաջողությամբ ես կարող եմ ասել, որ կան չինական շատ ապրանքատեսակներ,  որոնք գերազանցում  են և եվրոպական, և ամերիկյան արտադրանքին:

Եթե չինական արտադրանքին թերահավատորեն ենք վերաբերվելու, պարզապես  հիշենք, որ ամերիկյան ռազմարդյունաբերական համակարգը հիմնված է չինական արտադանքի վրա:

Հեղինակ` Հասմիկ Գյոզալյան