«Հովիկ Աբրահամյանի կառավարությունը ժառանգել էր շատ դժվար տնտեսական իրավիճակում գտնվող երկիր, առկա էին բարձր պետական պարտքի աճի տեմպեր, ուստի տնտեսական աճ ապահովել այս 1.5 տարիների ընթացքում, չհաջողվեց: Կրկին լուծում չստացավ գործազրկության խնդիրը, բնակչության 1/3-ը շարունակում է մնալ աղքատ:

Այս Կառավարությունը միակն էր, որ ստիպված եղավ բյուջեի եկամուտները նվազեցնելով հաստատել բյուջե: Նրանք ավելի շատ պարտք էին ներգրավում՝ դեֆիցիտը ծածկելու համար, և քանի որ չկային եկամուտներ, ավելանում էր բյուջեի մուտքերն ապահովելու խնդիր: Ինչ վերաբերում է արտահանմանը, ապա որոշակի հաջողություններ ունեցան հատկապես 2016 թվականին: Այստեղ մեծ դեր խաղաց Թուրքիա-Ռուսաստան հարաբերությունների վատթարացումը: Սակայն, պետք է նշեմ, որ արտահանումը որակական առումով լուրջ թերություններ ունի: Մենք շարժվում ենք բանանային երկրի մոդելով»,-լրագրողների հետ հանդիպման ժամանակ ասաց տնտեսագետ Վիլեն Խաչատյանը:

Տնտեսագետի հաղորդմամբ, անկում են ապրել ներդրումները, բնակչության գնողունակությունը: Վիլեն Խաչատյանի խոսքով՝ տնտեսական ցնցումներ առաջացնող երևույթներից էին նաև ապրիլյան պատերազմն ու «Սասնա ծռեր»-ի  գործողությունը:

«Նոր Կառավարությունը ժառանգելու է դժվար իրավիճակում գտնվող տնտեսություն և, եթե համակարգային չեղան փոփոխությունները, որևէ արդյունք չի լինելու: Դրված ցուցանիշների իրագործումը, մենաշնորհի, կոռուպցիայի դեմ պայքարը պետք է հասարակության համար տեսանելի լինի: Սակայն 7 ամիսը շատ քիչ է  տեսանելի արդյունք ապահովելու համար»,-նկատեց տնտեսագետը:

Վիլեն Խաչատյանը նշում է՝ վերջնական պետք է կառուցվեն մոլիբդենի, ոսկու, պղնձի գործարանները, կասեցնեն արտագաղթը, ուղեղների արատահոսքը:

Անի Կարապետյան