Ի՞նչ աղբյուրներից են իշխող «Քաղաքացիական պայմանագիր» (ՔՊ) կուսակցությանը նվիրատվություններ փոխանցվել։ Նույնիսկ նրանք չգիտեն, որոնց անունից փոխանցումները կատարվել են, ասում է հետաքննող լրագրողը, գրում է Ազատությունը։
«Էն մարդիկ, ովքեր իբր թե նվիրատուներ են, մեր հետ զրույցներում կտրուկ հերքել են, որ իրենք նվիրատվություն են կատարել», - «Ազատության» հետ զրույցում ասաց Մկրտիչ Կարապետյանը:
«Քաղաքացիական պայմանագրի» 2022 թվականի դրամահավաքի պատմությունը բացահայտել է «Սիվիլնեթ»-ի հետաքննությունը՝ միջազգային հետաքննական ցանցի հետ համատեղ։
Հետաքննության համահեղինակ Մկրտիչ Կարապետյանն ասում է՝ կուսակցության նվիրատուների հիմնական մասը ՔՊ-ի թեկնածուներն են եղել 2022-ին համայնքային ընտրություններում:
Կոնկրետ 15 նվիրատու հերքել է, որ գումար է նվիրաբերել։ Եղել է մեկը, որ ոչ մի դրամ եկամուտ չի ունեցել, բայց լրագրողի զանգից պարզել է՝ մեկ միլիոն դրամ է փոխանցել իշխող կուսակցությանը։ Լրագրողների զանգից անակնկալի է եկել Վեդի համայնքի ավագանու անդամ Սերոբ Ավետիսյանը, որի հետ զրույցը հրապարակել է լրատվամիջոցը.
«Նվիրատվություն մեկուկես միլիոնը Դուք ե՞ք իրականացրել, թե՞՝ ոչ»: - «Չէ, սխալվում եք»:
Զարմացել է նաեւ Տաշիրի ավագանու նախկին անդամ Մելինե Սուքիասյանը, որն, ըստ նվիրատվությունների ցուցակի, 2022-ի հոկտեմբեր և նոյեմբեր ամիսներին 3 միլիոն դրամ է փոխանցել. - «Ես այդպիսի գումարներ չեմ ունեցել և չէի էլ կարող փոխանցել»:
«Մենք անխուսափելիորեն կոռուպցիան արմատախիլ ենք անելու Հայաստանի Հանրապետությունից, և մեր այս կամքին թող որևէ մեկը չկասկածի», - ժամանակին հայտարարել է վարչապետ Նիկոլ Փաշինյանը:
Կոռուպցիան արմատախիլ անելու խոստումներով իշխանության եկած կուսակցության դրամահավաքի պատմությունն ի՞նչ անուն ունի: Նկարագրված է Քրեական օրենսգրքում, ասում է ընտրական ոլորտի փորձագետ Վարդինե Գրիգորյանը. - «Ակնհայտորեն ամբողջությամբ ինքը ապօրինի գործունեություն է այլ անձի անունից նվիրատվություն կատարելը՝ որպես քրեական պատասխանատվություն ենթադրող արարք»:
«Քաղաքացիական պայմանագիր»-ը հայտնել է, որ 2022-ին ստացել է շուրջ 170 մլն դրամի նվիրատվություն, ինչը կուսակցության տարեկան ֆինանսավորման ավելի քան մեկ երրորդն է: Հետաքննությամբ պարզվել է, որ կանխիկ փոխանցում էլ է եղել, ինչն արգելվում է օրենքով, ինչպես նաև՝ սահմանված չափից ավելի։
«Նյութը անելուց ձևավորվել է ներքին համոզմունք, որ «Քաղաքացիական պայմանագիր»-ը ինչ-որ կազմակերպված մի խիստ, միգուցե և ոչ օրինական մեխանիզմ է գործի դրել իր կուսակցության նվիրատվություններն ապահովելու համար», - նշեց Մկրտիչ Կարապետյանը:
Մանրամասները՝ սկզբնաղբյուրում
