«Հայ-ռուսական խորհրդարանական ակումբի հերթական նիստին մասնակցող «Ռուսաստանն այսօր» լրատվական գործակալության գլխավոր տնօրեն Դմիտրի Կիսելյովին երեկ, Ազգային ժողովում, իր ստատուսի համար անսովոր ընդունելություն է մատուցվել:
Կրեմլի ամենակարկառուն քարոզչի համբավ ունեցող չինովնիկի համար ԱԺ-ի գլխավոր դռներն էին բացվել և նրան սպասարկող մեքենան անմիջապես կանգնել էր գլխավոր մուտքի դիմաց: Նման ընդունելություն սովորաբար լինում է շատ բարձր մակարդակով այցերի ժամանակ:
Նիստի ընթացքում պարզվել է, սակայն, որ նույնիսկ այդ ընդունելությունը չի մեղմել Կիսելյովի մեջ կուտակված այն «զայրույթը», որն առաջացել է, երբ Երևանում տաքսու վարորդը չի կարողացել նրա հետ ռուսերեն խոսել: «Երևանում չեն մնացել ռուսական դպրոցներ, ռուսական մշակույթը երկրորդական է դառնում, դա էլ է վտանգավոր: Ես այսօր տաքսի նստեցի, քսան տարեկան տղան անգամ հաշիվը ռուսերեն չկարողացավ ասել: Եկեք ամեն մեկս աշխատանքի մեր մասն անենք: Եթե մենք խոսում ենք տրենդներից, եկեք անենք այն, ինչ մեզնից է կախված»,- նիստի ընթացքում հայտարարել է Կիսելյովը»,–գրում է թերթը։
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
