«Պետականացումից հետո փոխվել է Կարեն Դեմիրճյանի անվան մարզահամերգային համալիրի անվանումը: Այժմ այն կոչվում է «Ծիծեռնակաբերդի մարզահամերգային համալիր»: Սա ինչպե՞ս կարելի է պատկերացնել: Պատկերացնո՞ւմ եք՝ լինի Թոխմախի հարսանյաց սրահ: Անպայման պետք է Համալիրը կցեին Ծիծեռնակաբերդի հե՞տ: Եվ, սա այն դեպքում, երբ սեփականատերը մեծ տառերով էր գրել Կարեն Դեմիրճյանի անունը»,-այսօր՝ լրագրողների հետ հանդիպման ժամանակ ասաց Կարեն Դեմիրճյանի անվան մարզահամերգային համալիրի մամուլի և հասարակայնության հետ կապերի բաժնի պատասխանատու Կորյուն Գրիգորյանը, ով ասուլիսին ներկայացել էր զինվորական համազգեստով.
«Համալիրին տվել են զորամասի կարգավիճակ, ուստի, ստիպված ենք համազգեստով աշխատել»,-նշեց նա:
Կորյուն Գրիգորյանը տեղեկացրեց՝ Մարզահամերգային համալիրը ԴԱՀԿ-ն հանձնել է Ֆինանսների նախարարությանը, բայց, հիմա ամեն ինչ գտնվում է ՊՆ-ի ձեռքի ներքո:
«Կարծես թե ինչ-որ մարդիկ ինչ-որ բան շտապում են անել, բայց, թե ինչ հերթականությամբ, որ օրենքով, ոչ ոքի հայտնի չէ»:
Նա նշում է՝ Անկախության օրը նշվել է զավթած, գրավված օբյեկտում՝ ապօրինի օգտագործելով ուրիշի շարժական գույքը:
«Շահագործվել է Մարզահամերգային համալիրում գոյություն ունեցող այն շարժական գույքը, որը Համալիրին չի պատկանում»,-նկատեց Կորյուն Գրիգորյանը:
Նրա փաստմամբ՝ երբ ԴԱՀԿ-ն վերցրել է շենքը, դիմել են էլ.ցանցերին, որպեսզի անջատեն, բայց չի արվել.
«Սեպտեմբերի 21-ին ամբողջ լույսերը միացված էին, ամբողջ թափով աշխատում էր, հետաքրքիր է հարցնել՝ ո՞ւմ հաշվին, քանի որ դեռևս դա մեր հաշվին է»,-ասաց Կարեն Դեմիրճյանի անվան մարզահամերգային համալիրի մամուլի և հասարակայնության հետ կապերի բաժնի պատասխանատուն:
Ավելին, պարզվում է՝ Համալիրի աշխատակիցները շարունակում են աշխատել, իսկ թե ինչո՞ւ, Կորյուն Գրիգորյանը նկատում է՝ «Նրանց սիրտը ցավում է այս կառույցի համար, աշխատել են 30-35 տարի»:
Մեր այն հարցին, թե այդ դեպքում, ո՞վ է վճարելու նրանց՝ Կարեն Դեմիրճյանի անվան մարզահամերգային համալիրի մամուլի և հասարակայնության հետ կապերի բաժնի պատասխանատուն պատասխանում է՝ «Սա միայն Աստծուն է հայտնի»:
Անի Կարապետյան