sputnik.co.am-ը գրում է. Այն լուրը, որ հայտնի արգենտինացի ֆուտբոլիստ, իսպանական «Բարսելոնայի» հարձակվող Լիոնել Մեսին հայ է, հայտնվեց NSP.Ge վրացական տեղեկատվական գործակալության էջերում հինգշաբթի` հղում անելով «Վրաստան» թերթի գլխավոր խմբագիր Վան Բայբուրդին։ Մինչև ապրիլի 1-ը կարծես թե ժամանակ դեռ կա
Իրավիճակը պարզաբանելու նպատակով մենք կապվեցինք Վան Բայբուրդի հետ` հարցնելով, թե արդյո՞ք ճիշտ են նրա ենթադրությունները։
«Գիտե՞ք, երբ ինձանից որոշ լրագրողներ հարցազրույց են վերցնում, չգիտես ինչու հարցնում են, թե արդյո՞ք Սահակաշվիլին հայ է, Ժվանիան հայ է։ Որպեսզի խուսափեմ ոչ կոռեկտ հարցերից, ասացի. «Ի՞նչ եք կպել Սահակաշվիլուց, Ժվանիայից և մյուսներից… Եկեք Մեսիից խոսենք, չէ՞ որ նա էլ հայկական ծագում ունի»։
-Իսկ ո՞վ է Մեսին։
-Իսկ դուք չգիտեի՞ք, որ նրա տատն ու պապը թբիլիսաբնակ հայեր են` կաթոլիկ։ Եվ նա էլ կիսով չափ հայ է։
-Իսկ ինչի՞ց ենթադրեցիք։
-Ինչպե՞ս թե ինչից, նրա անունը Լիոնել է։ Մորական կողմից պապի անունը Լեոն էր, իսկ տատինը` Նելլի, այդպես էլ թոռան անունը Լիոնել դրեցին»։
Այսպես Վան Բայբուրդը կատակեց, իսկ մի շարք ԶԼՄ-ներ վերցրեցին նրա խոսքը և համատեքստից դուրս հանելով` Մեսիին հայ դարձրին։
Իրականում հայերը հաճախ են հայտնի դեմքերի մեջ հայրենակիցներ փնտրում։ Վերջին դեպքը ՖԻՖԱ-ի նախագահ Ջանի Ինֆանտինոյի շուրջ տարածած լուրերն էին։ Այն բանից հետո, երբ նա ընտրվեց ՖԻՖԱ-ի ղեկավար, hayastanNews.com կայքում նյութ հայտնվեց, թե Ինֆանտինոն հայ է։
Վրացիները անեկդոտ են պատմում, թե հայերը յուրաքանչյուրի մեջ հայ և ամեն ինչում հայկական հետք են փնտրում։ Չնայած սա զարմանալի չէ և մասամբ համապատասխանում իրականությանը։
Կատակը` կատակ, սակայն քչերը գիտեն, որ հայտնի ռուս զորահրամանատար Ալեքսանդր Սուվորովը, բանաստեղծ և բարդ Բուլատ Օկուջավան, համաշխարհային ճանաչում ունեցող կոմպոզիտոր Միշել Լեգրանը, դերասաններ Լուի դե Ֆյունեսն ու Օսվալդո Ռիոսը, ABBYY ընկերության հիմնադիր Դավիդ Յանը, ավտոարշավորդ Ալեն Պրոստը հայեր են։
Հայ ժողովրդի ողջ պատմության ընթացքում զանգվածային հալածանքների արդյունքում հայերը ապաստան են գտել աշխարհի տարբեր ծայրերում։ Հայկական հետքն ամենուր է։
Մեր հայրենակիցների զանգվածային արտագաղթը մի քանի փուլով է տեղի ունեցել։ Առաջինը 11-րդ դարում Անիի թագավորության անկման ժամանակ էր։ Առանձին վերաբնակեցումներ են եղել տարբեր զավթիչների հալածանքների արդյունքում։ Հայ ժողովրդի գաղթի հաջորդ մեծ ալիքն Արևմտյան Հայաստանում 19-րդ դարի վերջին և 20-րդ դարի սկզբում իրականացված ջարդերի ու Ցեղասպանության հետևանքով էր, դրանից հետո ողջ աշխարհում ձևավորվեց հայկական Սփյուռքը։
Նյութը՝ սկզբնաղբյուր կայքում
