«Ալյանս» կուսակցության նախագահ, ԱԺ պատգամավոր Տիգրան Ուրիխանյանն Ազգային ժողովի հերթական քառօրյային հարց ուղեց ԱԺ նախագահ Գալուստ Սահակյանին, իր իսկ խոսքով, ակնկալելով ստույգ պատասխան:
Վերջինս ցանկանում էր ճշտել, թե ինչու Հանրային հեռուստաընկերությունը մշտապես «կտրում» և չի ցուցադրում իր ելույթները խորհրդարանում ու հարցերն՝ ուղղված կառավարությանը:
Աժ նախագահ Գալուստ Սահակյանը չի պատասխանել հարցին՝նշելով, որ օրակարգի հետ կապ չունի ու նշել է, թե Հ1-ով իրեն էլ ցույց չեն տալիս:
Խոսակցությանը միջամտել է ԱԺ փոխնախագահ Էդուարդ Շարմազանովը՝ նշելով, որ նույնիսկ ՍԴ-ն է հակասահմանադրական ճանաչել խորհրդարանի հնարավոր պարտադրանքը Հանրային հեռուստաընկերությանը:
Տիգրան Ուրիխանյանը սակայն հակադարձել է, որ խոսքը վերաբերում է կոնկրետ անձի՝ իրեն և «Հ1-ի տնօրենն ու Ջաղինյան Ռուբենն իրավունք չունեն որոշեն, թե Ազգային Ժողովի պարտադիր ցուցադրման եթերից ում խոսքերը «կտրեն», ումը՝ ոչ»:
