«Զվարթնոց» օդանավակայանում իրեն դիմավորող լրագրողներին ոչինչ ասաց հայկական ծագմամբ ամերիկյան աստղ Քիմ Քարդաշյանն, ով ամուսնու`Քանյե Ուեսթի, դստեր`Նորթի, ինչպես նաև ընտանիքի անդամների և ուղեկցող անձանց հետ Երևանում կլինի 8 օր:
Չնայած մի քանի տասնյալ լրագրողներ փորձում էին որևէ խոսք լսել Քիմ Քարդաշյանից` նա ընդամենը բավարարվեց ողջունել ներկաներին` ձեռքի շարժումով:
Երևան մեկնելուց առաջ Քիմ Քարդաշյանը ամերիկյան լրատվամիջոցներին հայտարարել է, որ լրանում է Հայոց ցեղասպանության 100-րդ տարելիցն ու հենց այս տարի Երևան այցելելն իր համար կարևոր նշանակություն ունի, քանի որ իր հայրը` Ռոբերտ Քարդաշյանը հայ է` արմատներով Կարսից:
Նրան հայկական տարազով աղջիկը դիմավորել է աղ ու հացով, ինչպես օրեր առաջ դա արել էին Քիմ Քարդաշյանի ուղեկցող անձանց դիմավորելիսԼ
Հիշեցնենք, որ Asekose.am-ի տեղեկություններով Քիմ Քարդաշյանին Հայաստանի մայրաքաղաքում ընդունելու են ամենաբարձր մակարդակով:
ՀՀ իշխանությունները մտածում են, որ Քարդաշյանների երևանյան այցը պետք է քարոզչական առումով առավելագույնն օգտագործել ու այն ծառայեցնել ոչ միայն Հայոց ցեղասպանության 100-րդ տարելիցի միջոցառումները համաշխարհային մամուլում ներկայացնելու, այլ նաև մեր երկրում արտերկրից եկող զբոսաշրջիկների հոսքը խթանելու համատեքստում:
Նշենք, որ Քիմ Քարդաշյանը Երևանում հանգրվանելու է «Մարիոթ» հյուրանոցում, որտեղ նրա համար ամրագրվել է ամենաթանկ` «Նախագահական» համարը:
Ի դեպ, հյուրանոցի մոտ մի քանի տասնյակ մարդիկ էին սպասում Քիմ Քարդաշյանի ժամանմանը, իսկ օդանավակայանի ժամանման սրահում` ամերկահայ աստղի հեռանալուց հետո հրմշտոց էր սկսվել:
Քիմ Քարդաշյանի` Երևան ժամանման և նրան ավելի քան մեկ ժամ սպասող լրագրողների մասնակցությամբ կադրերը` դիտեք ստորև/Տեսանյութերը` 1in.am-ի և azatutyun.am-ի/:
